Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 84 Hüküm no: 26 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait olup Fatma Hatun b. Abdülmennan’ın oturduğu evde yapılan keşif sonucu kirasında indirim yapıldığı Mahrûse-i İstanbul mahallâtından Nahılbend mahallesinden zahrü’l-muvakkarât Fâtıma Hatun bt. Abdullah meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip Haremeyn-i Şerîfeyn Evkāfı’ndan mahalle-i merkūmede vâki‘ olup bir tarafı mahalle-i mezbûre mescidi ile ve bir tarafı Kara Paşa Vakfı ile ve bir tarafı Odabaşı mülkü ile ve bir tarafı tarîk-i âm ile mahdûd olup iki bâb tahtânî odaları ve bir orta sofayı ve bir ıstablı ve fırını ve bir selâmlığı ve kenîfi ve bi’r-i mâyı ve eşcâr-ı müsmireyi ve muhavvatayı müştemil olup icâre-i mu‘accele ve yevmî altı akçe icâre-i müeccelesi olan vakıf menzil harâba müşrif olup yevmî altı akçe icâre ecr-i misliden ziyâde olmağın üzerine varılıp ecr-i misli keşf olunmak taleb ederin dedikde bu fakīr ve hâssa mi‘mârlardan üstâd Mustafa b. Abdullah ve Mehmed b. Ahmed ve Hüsrev b. Abdullah nâm kimesneler ve zeyl-i kitâbda mastûrü’l-esâmî bî-garaz Müslimânlar ile menzil-i mezbûrun üzerine varılıp mütevellî-i vakf mezkûr Hasan Bey el-bevvâb-ı sultânî muvâcehesinde keşf olundukda fi’l-vâki‘ gāyet eyle harâba müşrif olup yevmî altı ile akçe icâreye tahammülü almayıp ecr-i misli yevmî dört akçe olmak üzere Müslimânlar ittifâk ettikleri ecilden yevmî iki akçe icâresi hat olunup min-ba‘d menzil-i mersûmun ücreti dört akçe olup ve lâzım gelen meremmâtı kendi mâlıyla edip vakıfdan bir akçe taleb etmeyip menzil-i mezbûre binâ ihdâs ederse kendi sâkine olup kendiden sonra vakfın olmak üzere mütevellî-i mezkûr Hasan Bey izin verdikde mâ-vaka‘a alâ-vukū‘ihî gıbbe’t-taleb sebt olundu. Tahrîren fî-evâhiri Şevvâli’l-mükerrem li-sene semân aşere ve elf. Şühûdü’l-hâl: Kurt Bey b. Abdullah, Derviş b. Ramazan el-kayyım, Mustafa b. Abdullah, Mehmed b. Ahmed, Hüsrev b. Abdullah, Mahmud Halîfe el-imâm, Durmuş Dede, Ahmed Bey b. ( ) el-bevvâb-ı sultânî ve gayruhüm.