Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 88 Hüküm no: 30 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’nın kiracılarının borçlarını kabul ettiği Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘-i şerîfde evkāf-ı mezbûreye mukaddemâ câbî olan işbu hâmilü’l-kitâb zahrü’l-emsâl Eyüb Bey b. Ali nâm bevvâb-ı sultânî mahzarında ikrâr ve takrîr-i kelâm edip mezbûr Eyüb Bey evkāf-ı mezbûreye bin on dört senesi Muharremi’nin ibtidâsından târîh-i kitâb senesi Cemâziyelâhiresi’nin gāyetine gelince câbî olmağın müddet-i mezbûrede evkāf-ı merkūmenin icâresinden cem‘ ve kabz eylediği akçenin sekiz yük ve otuz sekiz bin üç yüz doksan üç akçesini benden evvel evkāf-ı mezbûreye mütevellî olan Hamza Bey b. Abdullah’a teslîm edip ve mezbûr Hamza Bey’in zaman-ı tevliyetinde müste’cirîn zimmetlerinde bâkī kalıp ba‘dehû cem‘ eylediği yüz yetmiş üç bin beş yüz altmış dört akçeyi ve benim mütevellî olduğum zamandan tahsîl eylediğim iki yüz kırk bir bin üç yüz yirmi akçeyi bi’t-tamâm bana teslîm edip ben dahi alıp kabz eyledikden sonra mütevellî-i mezbûr Hamza Bey’in tevliyeti zamanından lâzım gelen icâreden yetmiş sekiz bin yedi yüz akçe icâresi ve benim zaman-ı tevliyetimde lâzım gelen icâreden iki yüz otuz yedi bin üç yüz seksen üç akçeyi yedinde olan müfredât defteri mûcebince müste’cirîn zimmetlerinde bâkī gösterdikde câbî-i merkūm Eyüb Bey ile ber-mûceb-i defter müste’cirînden ale’l-infirâz suâl eylediğimde icârât-ı bâkiye fi’l-hakīka zimmetimizde deynimizdir deyu ikrâr ile cevâb vermeğin mezbûr Eyüb Bey’in evkāf-ı mezbûre icârâtında min-ba‘d alâkam kalmadı dedikde mütevellî-i mezbûr el-Hâc Hasan Bey ikrâr-ı meşrûhunda merkūm Eyüb Bey dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olundu. Tahrîren fî-evâili şehri Recebi’l-mürecceb li-sene tis‘a aşere ve elf. Şühûdü’l-hâl: Fahrü’l-a‘yân Mehmed Ağa b. Abdülmennan, Mustafa Bey b. Sefer, İbrahim Çelebi b. Ya‘kub, Ferhad Bey b. Abdullah, Mahmud Bey b. Abdullah ve gayruhüm.