Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 89 Hüküm no: 31 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisinin usulsüz olarak el koyduğu evden el çektirilmesi Mahrûse-i İstanbul’da merhûm Şeyh Ebü’l-vefâ Câmi‘-i şerîfi kurbünde Hoca Teberrük mahallesi sükkânından İbrahim Çelebi <> ve Safiye Hatun veledeyn-i Mehmed Çavuş meclis-i şer‘-i şerîfde bi’l-fi‘il Haremeyn-i Şerîfeyn Evkāfı mütevellîsi olup menzil-i âti’l-beyâna vâzı‘ü’l-yed olan fahrü’l-akrân Hasan Bey b. Mehmed nâm bevvâb-ı sultânî mahzarında takrîr-i da‘vâ edip mahalle-i mezbûrede vâki‘ hudûdunun bir tarafı Mahmud Çelebi b. ( ) mülküne ve bir tarafı Mehmed Çelebi b. ( ) mülküne ve bir tarafı mahalle-i mezbûre mescidine vakıf menzile ve bir tarafı tarîk-i âmma müntehî olup tahtânî ve fevkānî iki bâb evleri ve bir hücreyi ve bi’r-i mâyı ve bir kenîfi müştemil olan menzil bundan akdem Hasnâ Hatun bt. Abdullah’ın mülkü iken dokuz yüz elli Zilka‘desi’nin evâsıtında evvelâ kendi nefsine ba‘dehâ oğlunun oğlu Mustafa’ya ve kızının oğlu Mustafa’ya ve Pîrî’ye ve bunların evlâdına ve evlâd-ı evlâdına ba‘de’l-inkırâz Medîne-i Münevvere fukarâsına vakf ve şart edip tescîl-i şer‘î ettirip hâlâ biz mezbûr Pîrî’nin sulbiye kızı Kamer nâm hatunun sadrî oğlu olan mezbûr Mehmed Çavuş’un sulbî oğlu ve sulbiye kızı olup menzil-i mezbûrun hakk-ı süknâsı ber-mûceb-i şart-ı vâkıfe bize münhasıra olup dahi Medîne-i Münevvere fukarâsına âid olmamışiken mütevellî-i merkūm vâzı‘ü’l-yed edip tasarrufumuza mâni‘ olur vâki‘ hâl suâl olunup kasr-ı yede tenbîh olunmasın taleb ederiz dediklerinde gıbbe’s-suâl mersûm cevâb verip fi’l-vâki‘ mezbûre Hasnâ Hatun menzil-i mezkûru târîh-i merkūmda vech-i muharrer üzere vakf ve şart eylemişdir lâkin müdde‘iyân-ı mezbûrân İbrahim Çelebi ve Safiye Hatun mezbûr Pîrî’nin kızının evlâdından oldukları ma‘lûm değildir deyu münkir olup müdde‘iyân-ı mezbûrândan da‘vâlarına mutâbık beyyine taleb olundukda ahrâr-ı Müslimînden Behram Bey b. Abdullah ve Mehmed b. Ahmed nâm kimesneler meclis-i şer‘a li-ecli’ş-şehâde hâzırân olup fi’l-hakīka müdde‘iyân-ı mezbûrân İbrahim Çelebi ve Safiye Hatun mezbûr Mehmed Çavuş’un sulbî oğlu ve sulbiye kızıdır ve merkūm Mehmed Çavuş dahi Kamer nâm hatunun sadrî oğludur ve mezbûre Kamer Hatun dahi merkūm Pîrî’nin sulbiye kızıdır menzil-i mezbûrun süknâsı ber-mûceb-i şart-ı vâkıfe müdde‘iyân-ı mezbûrânın haklarıdır biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda mütevellî-i mersûm menzil-i mezbûrdan kasr-ı yede tenbîh olunup mâ-vaka‘a bi’t-taleb ketb olundu. Tahrîren fî-evâsıtı şehri Ramazâni’l-mübârek li-sene tis‘a aşere ve elf. Şühûdü’l-hâl: Mustafa Bey b. Abdullah, Ferhad Bey b. Abdullah, İbrahim Çelebi b. Ya‘kub, Mustafa Çelebi b. ( ) ve gayruhüm.