Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 90 Hüküm no: 32 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usulsüz olarak satışı yapılan evin Haremeyn Evkafı’na ait olduğu Haremeyn-i Şerîfeyn Evkāfı’na bi’l-fi‘il mütevellî olup menzil-i âti’l-beyânın vakfiyetini da‘vâya kıbel-i şer‘den mütevellî nasb olunan fahrü’l-akrân Hasan Bey b. Mehmed nâm bevvâb-ı sultânî menzil-i âti’z-zikre zü’l-yed olduğu şer‘an sâbit olan fahrü’l-kuzât Mehmed Nazmi Efendi b. Mustafa ve Saime bt. Sinan nâm hatun mahzarlarında takrîr-i da‘vâ edip mahrûse-i İstanbul’da el-Hâc Bayram mahallesinde vâki‘ hudûdunun bir tarafı Derviş Çelebi b. Ramazan mülküne ve bir tarafı Sahhâf Muharrem b. ( ) mülküne ve bir tarafı Hümâ Hatun bt. Hasan Çavuş mülküne ve bir tarafı tarîk-i âmma müntehî olup dâhiliyye ve hâriciyye muhavvateyni müştemil olup muhavvata-i dâhiliyyesi iki bâb tahtânî evleri ve bir fırını hâvî ve muhavvata-i hâriciyyesi üç bâb tahtânî odaları ve cüneyneyi ve dört bâb dükkânı ve kenîfi hâvî olan menzil cümle tevâbi‘i ile bundan akdem mezbûre Sâime’nin cedde-i fâsidesi Rabia Hatun bt. Mehmed mülkü iken dokuz yüz seksen senesi Rebî‘ü’l-evveli’nin ibtidâsında evvelâ kendi nefsine ba‘dehâ evlâdına ve evlâd-ı evlâdına neslen ba‘de neslin ba‘de’l-inkırâz Medîne-i Münevvere fukarâsına vakf ve habs eylemişiken hâlâ ber-mûceb-i şart-ı vâkıfe menzil-i mezbûrun süknâsı merkūme Sâime’ye münhasıra olmağla mezkûr Mehmed Efendi’ye mülkdür deyu altmış bin akçeye bey‘-i bâtla bey‘ eylemiş vâki‘ hâl suâl olunup menzil-i mezbûr vakfiyet üzere ibkā ve tasarruf olunmasın taleb ederim dedikde gıbbe’s-suâl mezbûr Mehmed Efendi cevâb verip menzil-i mezbûru işbu hâzıra fi’l-meclis olan Saime Hatun cedde-i fâsidesi olan mezbûre Rabia Hatun’dan müntakil mülkdür deyu altmış bin akçeye bey‘-i bâtla bana bey‘ edip ben dahi iştirâ eylemeğin vaz‘-ı yed eyledim vech-i mezkûr üzere vakıf olduğu ma‘lûmum değildir deyu münkir olup mezbûre Saime istintâk olundukda fi’l-hakīka cedde-i fâsidem mezbûre Rabia Hatun’dan irs-i şer‘le intikāl eylemiş mülküm olmağın bey‘ ettim deyu vakfiyetini münkire olup mütevellî-i mezbûrun da‘vâsına muvâfık beyyine taleb olundukda ahrâr-ı Müslimînden olup mahalle-i mezbûre sükkânından Yahya Halîfe b. Ramazan el-imâm ve Ahmed Ağa b. Abdülmennan ez-zevvâku’s-sultânî ve Halil Bey b. Ahmed ve Kurt b. Abdullah ve Derviş Reis b. Ramazan ve Hüseyin b. Mahmud nâm kimesneler meclis-i şer‘a li-ecli’ş-şehâde hâzırân olup fi’l-vâki‘ menzil-i mezbûru cümle tevâbi‘i ile mezbûre Rabia Hatun mülkü iken târîh-i mezbûrda evvelâ kendi nefsine ba‘dehâ evlâdına ve evlâd-ı evlâdına neslen ba‘de neslin ba‘de’l-inkırâz Medîne-i Münevvere fukarâsına vakf ve habs edip teslîm ve kabûl ve tescîl-i şer‘î ettirmişdir, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda mûcebi ile hükm olunup mâ-hüve’l-vâkı‘ bi’t-taleb ketb olundu. Tahrîren fî-evâhiri şehri Ramazâni’l-mübârek min-şühûri sene tis‘a aşere ve elf. Şühûdü’l-hâl: Halil Bey b. Ahmed, Hüseyin Çavuş b. Abdullah, Kasım b. Abdullah, Murad b. Abdullah, Abdulbâki Çelebi b. Mehmed ve gayruhüm.