Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 91 Hüküm no: 33 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs Hatun bt. Ahmed tarafından el konulan evin Haremeyn Vakfı’na ait olduğu Mahmiye-i Kostantıniyye’de bi’l-fi‘il Haremeyn mütevellîsi olan fahrü’l-akrân Hasan Bey b. Mehmed nâm bevvâb-ı sultânî meclis-i şer‘-i şerîfde menzil-i âti’z-zikr vâzı‘atü’l-yed olduğu nehc-i şer‘î üzere sâbit olan Belkıs Hatun bt. Ahmed tarafından husûs-ı âti’l-beyâna vekîl olup hasm-ı şer‘î-i câhid mahzarında bi-mâ-hüve nehci’s-sübût şer‘an vekâleti sâbite olan Ahmed Efendi b. Mehmed nâm kādı mahzarında takrîr-i da‘vâ edip mahmiye-i mezbûrede Küçük Karaman nâm mevzi‘de düstûr-ı mükerrem Hafız Ahmed Paşa[‘nın] binâ ettiği câmi‘-i şerîf kurbünde vâki‘ olup lede’l-ahâlî ma‘lûmü’l-hudûd olan menzili bundan akdem dokuz yüz seksen târîhinde Sarı Muhyiddin Efendi nâm kādının mülkü olup tasarrufunda iken mukaddemâ süknâsı kendiye ba‘dehû kızları Âişe ve Emine’ye ba‘dehâ evlâdlarına ba‘de’l-inkırâz îcâr olunup ücreti Medîne-i Münevvere fukarâsına irsâl olunmak şartı üzere vakfedip târîh-i mezbûrda mahmiye-i mezbûrede nâibü’ş-şer‘ olan Ahmed Efendi ba‘de ri‘âyetihî şerâit <<’l-kabûl>>’l-hükmi’ş-şer‘î vech-i meşrûh üzere sıhhat-ı vakfa ve lüzûmuna hükm ve tescîl edip hâlâ mezbûr Muhyiddin Efendi ve kızları mezbûretân Emine ve Âişe vefât edip evlâdları dahi münkarize olmuşdur. Menzil-i mezbûru ber-mûceb-i şart-ı vâkıf-ı mezbûr tevliyetim hasebi ile îcâr edip ücretini fukarâ-i mezbûrîne irsâl murâd ettiğimde mezkûre Belkıs Hatun evlâddan olmayıp ecnebiyye iken bilâ-vech-i şer‘î vaz‘-ı yed edip tasarrufuma mâni‘ olur şer‘le yedi kasr olunup menzil-i mezbûr Medîne-i Münevvere fukarâsı için zabt ve îcâr olunmak taleb ederin dedikde gıbbe’s-suâl vekîl-i mezbûr cevâb fi’l-vâki‘ menzil-i mezbûr mezkûr Sarı Muhyiddin Efendi’nin mülkü olup mülkiyet üzere tasarruf ederken vefât edip kızları Âişe ve Emine’ye irsle intikāl edip ba‘dehû mezbûre Âişe dahi mülkiyet üzere mutasarrıf iken vefât edip menzil-i mezbûrdan nısf hisse-i şer‘iyye-i şâyi‘ası li-ebeveyn hemşîresi ve bi-tarîki’l-inhisâr vârisesi mezbûre Emine’ye intikāl edip ba‘dehû mezkûre Emine dahi vefât ettikde menzil-i mezbûr bi cümletihi sadriye kızı ve vârisesi diğer Âişe’ye inhisâr tarîki üzere intikāl edip ba‘dehû mezbûre Âişe dahi vefât ettikde menzil-i mezbûr sadriye kızı ve bi tarîkı’l-inhisâr vârisesi müvekkilem mezbûre Belkıs Hatun’a intikāl eyledi vech-i meşrûh üzere mülk-i mevrûsudur üslûb-ı sâbık üzere ceddi mezbûr Muhyiddin Efendi’nin vakfı olduğu müvekkile-i mezbûrenin ma‘lûmu değildir deyu vakfiyetin inkâr ettikde mukaddemâ vekîl-i mezbûrdan müvekkile-i mezbûre Belkıs’ın minvâl-i meşrûh üzere evlâd-ı vâkıf-ı mezbûrdan olduğuna beyyine taleb olundukda ıtyân-ı beyyine[den] âcize olup ba‘dehû mütevellî-i mezbûrdan menzil-i mezbûrun üslûb-ı sâbık üzere vakfiyetine beyyine taleb olundukda udûl-i Müslimînden Baba Yahya b. Pîrî ve el-Hâc Mehmed b. Ali nâm kimesneler li-ecli’ş-şehâde meclis-i şer‘a hâzırân olup fi’l-hakīka menzil-i mezbûr müşârun-ileyh Sarı Muhyiddin Efendi’nin mülkü olup taht-ı tasarrufunda iken süknâsı evvelâ kendiye ba‘dehû kızları mezbûretân Âişe ve Emine’ye ba‘dehâ evlâdlarına ba‘de’l-inkırâz îcâr olunup ücreti Medîne-i Münevvere fukarâsına irsâl olunmak şartı üzere târîh-i mezbûrda vakfedip nâib-i mezkûr Ahmed Efendi ba‘de ri‘âyetihî şerâiti’l-hükm ve’t-tescîl sıhhat-i vakf-ı mezbûra ve lüzûmuna hükm ve tescîl eyledi, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle oldukdan sonra mûcebi ile menzil-i mezbûrun beyân olunan minvâl üzere vakfiyetin takrîr ve ibkā olundu. Tahrîren fî-evâhiri Cemâziyelâhire li-sene tis‘a aşer ve elf. Şühûdü’l-hâl: Abdurrahman Efendi el-Kadı, Mustafa Bey b. Yusuf el-Cündî, Satılmış b. Mustafa, Eyüb Bey b. Ali el-Bevvâb ve gayruhüm.