Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 92 Hüküm no: 34 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdülmennan’nın Haremeyn Evkafı’na ait evi kiraladığı Bi’l-fi‘il Haremeyn-i Şerîfeyn Evkāfı’na mütevellî olan fahrü’l-akrân Hasan Bey b. Mehmed nâm bevvâb-ı sultânî meclis-i şer‘-i şerîfde Dergâh-ı âlî -dâme mahfûfen bi’l-me‘âlî- müteferrikalarından zahrü’l-a‘yân Ali Ağa b. Abdülmennan mahzarında ikrâr ve takrîr-i kelâm edip evkāf-ı mezbûreden olup mahrûse-i İstanbul’da Nahılbend mahallesinde vâki‘ bir tarafı İbrahim Efendi b. ( ) el-kâtib mülküne ve bir tarafı ( ) vakfına ve iki tarafı tarîk-i âmma müntehî olup fevkānî ve tahtânî iki bâb odaları ve kenîfi müştemil olup Hümâ Hatun bt. Abdullah Haremeyn-i Şerîfeyn fukarâsına vakfeylediği menzil cümle tevâbi‘i ile târîh-i kitâb şehr-i gurresinden üç sene tamâmına varınca yevmî üç akçe icâre-i müeccele ve üç bin akçe icâre-i mu‘accele ile merkūm Ali Ağa’ya tevliyetim hasebi ile îcâr edip ol dahi vech-i meşrûh üzere istîcâr ve kabûl eyledikden sonra icâre-i mu‘accelesi olan üç bin akçeyi mersûm Ali Ağa yedinden vakf için alıp kabz eyledim ve menzil-i mezbûrda kendi mâlından her ne binâ ihdâs ederse ettiği binâ vakfın olup sarf olunan akçesi icâre-i mu‘accelesine zam olunmak üzere mezbûr Ali Ağa’ya izin verdim dedikde mütevellî-i mezbûrun ikrâr-ı meşrûhunu müste’cir-i mezbûr Ali Ağa dahi vicâhen tasdîk ve şifâhen tahkīk ettikde mâ-hüve’l-vâkı‘ bi’t-taleb ketb olundu. Tahrîren fî-evâsıtı şehri Şevvâli’l-mükerrem min-şühûri sene tis‘a aşere ve elf. Şühûdü’l-hâl: İlyas Bey b. ( ) el-bevvâb, Kurt Bey b. ( ), el-Hâc Perviz b. Abdullah, Yusuf b. Abdullah eş-şehîr bi-orducubaşı ve gayruhüm.