Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 95 Hüküm no: 36 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Çavuş b. Abdülmennan’ın Haremeyn Vakfı’na ait oturduğu eve yaptığı masraf Mahrûse-i İstanbul’da Altıpoğaça mahallesinde vâki‘ lede’l-ahâlî ma‘lûmü’l-hudûd olup merhûm Dalgıç Ahmed Paşa Haremeyn-i Şerîfeyne vakfeylediği menzilin hâricinde iki bâb tahtânî odaya ve bir su kuyusu ve bir kenîf ve muhavvataya beher şehr altmış akçe icâre-i müeccele ile müste’ciri olan işbu hâmilü’l-kitâb fahrü’l-akrân Muharrem Çavuş b. Abdülmennan meclis-i şer‘-i şerîfe gelip takrîr-i kelâm ve ta‘bîr ani’l-merâm edip bundan akdem zikr olunan odalar harâba müşrif olup meremmâta muhtâc oldukda vakf-ı mezbûra mukaddemâ mütevellî olan Hamza Bey b. Abdullah nâm bevvâb-ı sultânî kendi mâlımdan meremmet edip ve muhavvata-i mezbûrede dahi kendi mâlımla her ne binâ ihdâs edersem ettiğim binâ ve meremmât vakfın olup ba‘dehû cümle harc u sarf olunan akçem vakıfda icâre-i mu‘accelem olmak üzere izin vermeğin ben dahi ma‘rifet-i şer‘le kendi mâlımdan zikr olunan iki bâb tahtânî odayı meremmât ve müceddeden bir fevkānî oda ihdâs eylemişidim hâlâ kıbel-i şer‘den üzerine varılıp ne mikdâr akçeye tahammülü vardır keşf olunmasın taleb ederim dedikde cânib-i şer‘den Mevlânâ Mehmed Çelebi b. Süleyman el-müderris ve hâssa mi‘mârlardan üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp bi’l-fi‘il vakf-ı mezbûre mütevellî olan el-Hâc Hasan Bey b. Mehmed mahzarında keşf olundukda fi’l-vâki‘ kadîmden olan iki bâb tahtânî odaların ocağı ve üzerlerinin kiremidi ve bir odanın tuğla ve döşeme ve bir taş duvarı meremmât olunup harc olunan kiremidinin ve tuğlasının ve taşının ve kireç ve horasanisinin ve badanasının yedi bin akçeye tahammülü ve müceddeden binâ olunan fevkānî odanın tûlen ve kadden iki yüz sekiz zirâ‘ taş duvarının ve seksen dört zirâ‘ tuğla dolma duvarının ve yüz yetmiş zirâ‘ sakf-ı çatısının ve hesâb-ı şatrancî üzere otuz sekiz zirâ‘ tavanının ve yüz kırk dokuz zirâ‘ tahta döşemesinin ve elli sekiz zirâ‘ tuğla döşemesinin ve dört demir penceresinin ve iki çârçûbelü camının ve dört sâde camlarının ve bir çatma masandırasının ve iki dolabının ve bir ocağının ve kırk zirâ‘ tahta havlusunun ve iki oda kapısı ve bir havlu kapısının ve bi’l-cümle bu mezkûrânın taşının ve tuğlasının ve kireç ve horasanisinin ve sâir kerestesinin ve mismârının ve neccâriyye ve ırgadiyye ve hammâliyesinin otuz iki bin dokuz yüz otuz akçeye cem‘an meremmât-ı mezbûre ile otuz dokuz bin dokuz yüz otuz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip be‘dehû meclis-i şer‘a gelip haber vermeğin mâ-vaka‘a bi’t-taleb ketb olundu. Tahrîren fî-evâhiri şehri Şevvâli’l-mükerrem li-sene tis‘a aşere ve elf. Şühûdü’l-hâl: Mustafa Efendi b. Ebîbekir el-kādî, Mustafa Çavuş b. Nasuh, Abdürrahim b. Abdürrahim el-imâm, Rıdvan b. Sadullah el-müezzin, Yusuf b. Abdullah, Hüseyin b. Mustafa ve gayruhüm.