Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 96 Hüküm no: 37 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdülmennan’ın Haremeyn Vakfı’na ait oturduğu eve yaptığı masraf Haremeyn-i Şerîfeyn Evkāfı’ndan olup mahrûse-i İstanbul’da Nahılbend mahallesinde vâki‘ lede’l-ahâlî ve’l-cîrân ma‘lûmü’l-hudûd olan menzile yevmî üç akçe icâre-i müeccele ile mutasarrıf olan işbu hâmilü’l-kitâb fahrü’l-a‘yân Ali Ağa b. Abdülmennan nâm müteferrika meclis-i şer‘-i şerîfe gelip takrîr-i kelâm ve ta‘bîr ani’l-merâm [edip] bundan akdem menzil-i mezbûrun bir fevkānî odası harâba müşrif olup tecdîde muhtâc oldukda vakfın müsâ‘adesi olmamağın kendi mâlımdan tecdîd ve imâret edip ba‘dehû cümle ettiğim binâ vakfın olup harc u sarf olunan akçem vakıfda icâre-i müecceleme zam olunmak üzere izn-i şer‘ ve ma‘rifet-i mütevellî ile müceddeden bir fevkānî oda bir mağsel ve bir fırın ve yüz otuz zirâ‘ taş duvar ve iki kenîf ihdâs edip ve bir odanın dolma duvarlarını ve tahta döşemesini meremmât eylemişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf olunmasın taleb ederim dedikde savb-ı şer‘den Mevlânâ Mehmed Çelebi b. Süleyman el-müderris ve hâssa mi‘mârlardan üstâd Ali b. Halil irsâl olunup zeyl-i kitâbda mastûretü’l-esâmî olan Müslimîn ile menzil-i mezbûrun üzerine varılıp bi’l-fi‘il mütevellîsi olan Hasan Bey b. Mehmed nâm bevvâb-ı sultânî mahzarında keşf olundukda fi’l-vâki‘ yüz otuz zirâ‘ taş duvarı ve bir fevkānî oda ve dört zirâ‘ toloz kubbeli bir küçük mağsel ve bir fırın ve iki kenîf ve dokuz zirâ‘ kârîz müceddeden binâ olunup ve kadîmden olan bir odanın kırk zirâ‘ dolma duvar ve bir demir penceresi meremmât olunmağın bu cümleye harc olunan taşın ve tuğla ve kireç ve horasanisinin ve sâir kerestesinin ve kiremidlerinin ve künklerinin ve kurşununun ve mismârının ve neccâriyye ve ırgadiyye ve hammâliyesinin zikr olunan fevkānî odanın mukaddem olan iki bin akçe naksından gayrı mezbûr Ali Ağa ihdâs eylediği ebniyenin on sekiz bin beş yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip be‘dehû meclis-i şer‘a gelip ihbâr eylemeğin mâ-hüve’l-vâkı‘ bi’t-taleb ketb olundu. Tahrîren fî-evâili şehri Zilhicceti’ş-şerîfe li-sene tis‘a aşere ve elf. Şühûdü’l-hâl: Ahmed Efendi b. Ali el-imâm, Yusuf Halîfe b. ( ) el-müezzin, Ahmed Bey b. es-serrâcü’l-hâs, Yusuf Bey b. ( ) el-bevvâb, Şa‘ban b. Hasan el-müezzin, el-Hâc Perviz b. ( ) et-tabbâh ve gayruhüm.