Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 278 Hüküm no: 234 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. İsmail’in boşandığı eşinden olan küçük çocuğu Abdurrahim için nafaka takdir olunması Ma‘rûz, Sâhibe-i arzuhâl mu‘arrefetü’z-zât Zeliha bt. İsmail nâm hatun bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde zevci sâbıkı derûn-ı arzuhâlde mezkûrü’l-ism teba‘adan Ahmed Ağa b. Hasan nâm kimesne muvâcehesinde mezbûr Ahmed Ağa ile mukaddemâ zevciyyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan tahmînen iki yaşında sulbî oğlu Abdurrahim nâm sagīrin aslâ malı olmayıp ol vechile nafaka ve kisveye eşedd-i ihtiyâc ile muhtâc olmağla sagīr-i mezbûrun nafakası için babası mezbûr üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde ol dahi ba‘de’t-tasdîk sagīr-i mezbûrun nafakası için babası mezbûr Ahmed Ağa üzerine vakt ü hâle göre tarafeynin hâline nazaran kadr-ı ma‘rûf idüğü bi’l-ihbâr zâhir olan beher şehr kırkar guruş işbu târîh-i i‘lâmdan i‘tibâren kıbel-i şer‘den farz ve takdîr olunup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr üzerine rücû‘a vâlidesi ve hâdinesi mezbûre Zeliha Hatun’a kıbel-i şer‘den izin verildiği huzûr-ı [âlîlerine i‘lâm olundu]. Fî 27 Ca sene [12]57.