Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 279 Hüküm no: 235 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamparsum ve Artin kardeşlerin borçlarını taksitlendirmeleri Ma‘rûz, Mübârek Rikâb-ı kamer-tâb-ı mülûkâneye takdîm olunan işbu arzuhâl zahrına sâdır olan fermân-ı âlîlerine imtisâlen işbu arzuhâl ve hâmişinde mastûr derkenârlara nazar olundukda vilâyet-i Anadolu’da Karahisar-ı şarkī sancağında vâki‘ Ma‘âdin-i hümâyûn kazâsına tâbi‘ Cervat? karyesi re‘âyâlarından sâhibey-i arzuhâl Hamparsum ve Artin zimmîler ile karındaşları Mardıros ve Tomas zimmîlerin birbirlerine kefîl olarak zimmetlerinde karye-i merkūme ahâlîlerinden derûn-ı arzuhâlde isimleri mastûr Hasan nâm kimesneye cihet-i karzdan üç yüz elli guruş ve Hicvanoğlu? Mustafa’ya kezâlik cihet-i mezkûreden dört yüz elli guruş ve Kokasoğlu Artin zimmîye kezâlik cihet-i mezkûreden beş bin üç yüz guruş ve Evzanoğlu Dimitri zimmîye kezâlik cihet-i mezkûreden sekiz yüz elli guruş ve Yuşaoğlu Manuk zimmîye kezâlik cihet-i mezkûreden yüz yirmi guruş ki min-haysü’l-mecmû‘ yedi bin yirmi guruş deynleri olup lâkin meblağ-ı mecmû‘-ı mezkûru zimmiyyûn-ı mersûmûnun dâyinleri merkūmûna hâlen ve def‘aten bir vechile edâya iktidârları yoğiken zimmiyyûn-ı mesfûrûndan mersûm Mardıros dahi iki nefer sagīr evlâdını terk eylediği hâlde hâlik olup, mesfûr Tomas zimmî dahi alîl ve kâr ü kisbe kudreti olmadığından dâyinleri merkūmûn alacakları olan meblağ-ı mecmû‘-ı merkūmu asâleten ve vekâletlerine binâen ancak zimmiyân-ı mersûmândan hâlâ iddi‘â ile bi-gayrı vechin tazyîk eylediklerinden mahâllinde adem-i kudretleri dâyinleri merkūmûn muvâcehelerinde ber-nehc-i şer‘î sâbit olduğu hâlde düyûnlarını te’cîl ve taksît-i şer‘î ile edâ-i deyn etmek üzere bir kıt‘a fermân-ı âlîşân sudûrunu niyâz ve istirhâm eyledikleri zimmiyân-ı mersûmânın istid‘â-yı arzuhâlleri meâli ve Bâb-ı hazret-i fetvâ-penâhîde Anadolu mutasarrıfları dâ‘îlerne tahsîs buyurulan dâirede ma‘kūd meclis-i şer‘-i münîrde eyledikleri takrîrlerinden müstefâd ve bu makūle medyûnların hâlen edâ-i deyne kudretleri tahakkuk eylediği hâlde hâlen ve adem-i kudretlerini ber-nehc-i şer‘î dâyinleri muvâcehelerinde isbât eyledikleri takdîrce te’cîl ve taksît-i şer‘î ile deyn etdirilip def‘aten taleb ve ahz ve habs teklîfiyle tazyîk etdirilmemek şürût ve emsâlinden idüğü derkenârından müstebân olmağla bu sûretde sâhib-i arzuhâl mersûmân mahâllinde dâyinleri muvâcehelerinde adem-i kudretlerini ber-nehc-i şer‘î isbât eyledikleri sûretde şürût ve emsâline nazaran te’cîl ve taksît-i şer‘î ile edâ-i deyn etdirilip mugāyir-i şürût ve emsâl bi-gayrı vech-i şer‘î def‘aten taleb ve ahz ve hapislerini teklîfden tazyîk etdirilmemek bâbında livâ-i mezkûr müşîri atûfetlü Paşa hazretlerine ve kazâ-i mezkûr nâib ve a‘zâ-yı meclise hitâben bir kıt‘a [67b] fermân-ı âlîşân sudûru menût-ı re’y-i âlîleri idüğü huzûr-ı [âlîlerine i‘lâm olundu]. Fî 15 Ca sene [12]57.