Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 97 Hüküm no: 39 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahel v. Menahim’in Haremeyn Evkafı’na ait evi kiraladığı Haremeyn-i Şerîfeyn Evkāfı’na bi’l-fi‘il mütevellî olan el-Hâc Hasan Bey b. Mehmed nâm bevvâb-ı sultânî meclis-i şer‘-i şerîfde işbu hâmilü’l-kitâb Rahel v. Menahim Yahudi mahzarında ikrâr ve takrîr-i kelâm edip mahrûse-i İstanbul hısn-ı ebvâbdan Balad kapısı dâhilinde el-Hâc İsa mahallesinde vâki‘ lede’l-ahâlî ma‘lûmü’l-hudûd olup fevkānî ve tahtânî iki bâb evi bir kenîfi ve muhavvatayı müştemil olup Mehmed Çavuş b. Abdullah Haremeyn-i Şerîfeyn fukarâsına vakf ve şart eylediği menzil târîh-i kitâbdan üç sene tamâmına varınca yevmî üç akçe icâre-i müeccele ve beş bin akçe icâre-i mu‘accele ile mezbûr Rahel[‘e] tevliyetim hasebi ile îcâr eyledim ol dahi vech-i merkūm üzere istîcâr ve kabûl eyledikden sonra icâre-i mu‘accelesi olan beş bin nakd râyic fi’l-vakt akçeyi vakıf içi alıp kabz eyledim dedikde mütevellî-i mezbûrun ikrâr-ı meşrûhunu ve müste’cir-i merkūm Rahel dahi bi’l-[m]uvâcehe tasdîk edip ve menzil-i mezbûrun meremmât-ı lâzımesin dahi kendi mâlından meremmet edip vakıfdan akçe taleb etmek üzere müte‘ahhid oldukda mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâmin min-şühûr sene ışrîn ve elf. Şühûdü’l-hâl: Mustafa b. Abdullah, Ferhad Bey b. Abdullah, Ahmed b. ( ), Mehmed b. ( ) ve gayruhüm.