Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 102 Hüküm no: 44 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vahide Hatun bt. Mehmed’in vakfiyesi Mâ fîhi mine’l-vakfi’s-sahîh ve’t-tescîli’ş-şer‘î cerâ indî ma‘a kuyûdihî ve şerâitihî ve innî kad hakemtü bi-sıhhatihî ve lüzûmihî fî-husûsihî ve umûmihî âlimen bi-mevâki‘i’l-hilâfi’l-cârî beyne’l-eimmeti’l-eslâf ve ene’l-fakīr Mustafa b. Hüseyin el-Kādî bi-asâkiri Rumeli -ufiye-anhümâ- Âti’z-zikr vakf-ı sahîh ve tescîl-i şer‘î kuyûd ve şerâitiyle huzûmda cereyân etti ve eimme-i eslâf arasındaki ihtilâfı da bilerek husûsan ve umûmen sıhhat-i vakfa ve lüzûmuna hükmettim. Ben fakīr Mustafa b. Hüseyin el-Kādî bi-asâkiri Rumeli -ufiye-anhümâ- [11a] Ahsen-i kelâm-ı mu‘anvenün bihi’l-makāl ve eymen-i zikr-i yasduru-bihi küllü emrin zî-bâl hamden lillâhi’l-meliki’l-müte‘âl zî’l-azameti ve’l-celâl subhânehû men bi-yedihî mekālidi’l-umûr lehü’l-halk ve’l-emr ve ileyhi’n-nüşûr ve’s-salâtü alâ-Fâtihatî sûreti’n-nübüvveti’t-tâmme hâtemü’l-enbiyâ ve’r-rusul es-seyyidü’l-halîl ve’r-resûli’l-cemîl seyyidünâ Muhammed el-men‘ût bi-ulüvvi’z-zât ve semmu’s-sıfât ve alâ-alihi’l-ahyâr ve sahbihi’l-ebrâr ve men-tebi‘ahüm bi-ihsâni ilâ-yevmi’l-haşr ve’l-karâr. Ammâ ba‘d mahmiye-i İstanbul mahallâtından Alaca Mescid mahallesi sâkinlerinden sâhibetü’l-hayrât ve’l-hasenât ve tâlibetü’l-meberrât Vâhide Hatun bt. Mehmed vaktâki bu dünyâ-yı mekkâr-i medâr-bevâr ve bünyâdi nâ-pâyidâr mahall-i ikāmet ve cây-ı karâr değil idiğin iz‘ân edip kelime-i fâhire-i “ed-dünyâ mezra‘atü’l-âhire” vefkince mezra‘a-i dünyâda tohm-ı [hayratı] zirâ‘at etmeğe azîmet edip âmme-i tasarrufâtı câ’ize ve kâffe-i teberru‘âtı nâfize olduğu hâlde meclis-i şer‘-i şerîfde şâmihü’l-imâd ve mahfil-i dîn-i münîf-i râsihü’l-evtâdda ikrâr-ı sahîh-i şer‘î ve i‘tirâf-ı sarîh-i mer‘î kılıp mahalle-i mezbûrede vâki‘ bir tarafdan Medîne-i Münevvere Vakfı ve bir tarafdan Mesih Paşa Vakfı ve bir tarafdan Mehmed Çelebi mülkü ve bir tarafdan tarîk-i âm ile mahdûd olup yirmi dört sehm mukadder menzilden dokuz sehmine mukaddemâ mutasarrıf olan merhûm Ömer Çavuş vefât ettikden sonra zikr olunan yirmi dört sehm menzilden mutasarrıf olduğu dokuz sehmi oğlu Ahmed’e ve kızı Âişe’ye li’z-zekeri mislü hazzi’l-ünseyeyn intikāl ettikden sonra mezbûr Ahmed dahi vefât edip menzil-i mezbûrda olan hisse-i şer‘iyyesi sulbî oğlu Mehmed ve sulbiye kızı Fâtıma’ya intikāl ettikden sonra zikr olunan dokuz sehm hisse-i şer‘iyyeyi mezbûre Âişe’den ve Mehmed ve Fâtıma’dan sene-i erba‘a aşere ve elf Saferü’l-hayrı’nda on dokuz bin râyicü’l-vakt akçeye iştirâ edip mülk-i mahzım ve hakk-ı sırfım oldukdan sonra zikr olunan diğer <> yirmi dört <> sehm menzilden müşterâm olan dokuz sehm menzilimi hasbeten lillâhi’l-azîm vakf-ı sahîh-i şer‘î ile vakf ve habs eyledim ve şöyle şart eyledim ki, mâdâm ki hayâtda olam tebdîl ve tağyîr ve nasb [ve] azl-i mütevellî kendi yedimde olup mâdâm ki hayâtda olam sâkine olam ve benden sonra vâlidem işbu hâzıra bi’l-meclis Selime Hatun sâkine ola ba‘de vefâtihâ zevcim işbu hâzır bi’l-meclis Mehmed Dede b. Ca‘fer sâkin ola ba‘dehû oğulluğum işbu hâzır bi’l-meclis Mehmed b. Hasan sâkin ola ba‘dehû menzil-i mezbûru Medîne-i Münevvere -şerrefehallâhu ilâ yevmi’l-âhire- fukarâsına vakfettim Medîne-i Münevvere Evkāfı mütevellîsi olanlar zabt edip ecr-i misli ile îcâr edip hâsıl olan ribhi Medîne-i Münevvere fukarâsına irsâl ve îsâl eyleye deyu şart eyledim ve şöyle şart eyledim ki menzil-i mezbûr kable’l-îcâr sâkin olanlar meremmâta muhtâc oldukça kendi mâllarıyla imâret ve meremmet edeler dedikden sonra zikr olunan akārı vâkıfe-i mezbûre li ecli’t-tescîl mütevellî nasb ettiği Mehmed Çavuş b. Eymir’e teslîm ettiğine ikrâr u i‘tirâf edip mütevellî-i mezbûr dahi vâkıfe-i mezbûreyi bi’l-müvâcehe tasdîk ve kabz ve tesellümen ikrâr ve tahkīk edip emr-i ikrâr bi’l-vakf ve’t-tesellüm minvâl-i meşrûh üzere ikmâl ve tetmîm olundukdan sonra vâkıfe-i mezbûre takrîr-i kelâm edip eğerçi sıhhat-i vakf-ı akārda hilâf yokdur lâkin İmâm-ı A‘zam ve hümâm-ı akdem ve efham sirâcü’l-ümme ve tâcü’l-eimme Ebî Hanîfeti’l-Kûfî -cûziye hayrü’l-cezâ ve kûfî- katında lüzûm sıhhate lâzım olmamağla vakf-ı mezbûrdan rücû‘ edip mülk-i kadîmime red olunmak da‘vâ ederim deyu mütevellî-i mezbûr istintâk olundukda eğerçi İmâm-ı A‘zam hazretlerinin mezheb-i şerîfleri üzere hâl zikr olunan minvâl üzeredir lâkin İmâm-ı Rabbânî Ebû Yusuf eş-şehîr bi’l-imâmi’s-sânî ekreme bi’l-lutfi’s-subhânî lüzûm sıhhate lâzım olduğuna câzim olup ve İmâm-ı Muhammed b. el-Hasan eş-Şeybânî -aleyhi’r-rahme- hazretleri dahi teslîm ile’l-mütevellî olıcak sıhhat-ı vakfın lüzûmdan adem-i infikâkında tevakkuf etmemişdir deyu bu kitâb-ı müstetâbı muvakki‘ olan hâkim-i âdil-i âmil ve fâzıl-ı âlem-i kâmil hazretlerinden alâ-re’yi’l-imâmeyni’l-hümâmeyn lüzûm-ı vakf-ı mezbûra hükm taleb edicek hâkim-i müşârun-ileyh cânib-i vakfa nazarı ahrâ görüp âlimen bi’l-hilâf-ı vakf-ı mezbûrun lüzûmuna hükm buyurup menzil-i mezbûr vakf-ı lâzım-ı sahîh oldu. Min-ba‘d tebdîl ve tağyîre sa‘y ve mütesaddî olan envâ‘-i azâb ile mu‘azzeb ve esnâf-ı ikāb ile mu‘âkab ola. Tahrîren fî-evâhiri Recebi’l-ferd li-sene ışrîn ve elf, mine’l-hicreti men lehü kemâlü’ş-şeref. Şühûdü’l-hâl: Habib Efendi b. Abdüssettar el-Müderris, İbrahim Efendi el-musta‘id, Ali Efendi b. Hasbey el-musta‘id, Mustafa b. el-Hâc Abdi, Mehmed Bey b. Bâli el-bevvâb-ı sultânî, el-Hâc Sıyami b. Ramazan, Abdülkerim Çelebi el-kādî, Yusuf b. Abdullah, Sehrab b. Abdullah es-serrâc, Mustafa Çelebi el-mu‘îd, Mehmed Çelebi el-mütevellî, Mustafa Efendi el-müderris, Ahmed Ağa, Mehmed Efendi el-Kādî eş-şehîr bi-Boyacızâde, Mehmed Efendi Kâtib-i dîvân, Ramazan Ağa el-müteferrika, Ahmed Çavuş b. Uğurlu Kethüdâ-i İbrahim Paşa, Ahmed Çavuş-ı De[r]gâh-ı âlî, Mehmed Çavuş-ı De[r]gâh-ı âlî, Ahmed Çelebi b. İshak Efendi, Mehmed Halîfe b. Müstedâm, Hasan Kethüdâ b. Haydar, Hayati Halîfe el-imâm ve gayruhüm.