Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 104 Hüküm no: 45 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Ali’nin oturduğu Haremeyn Evkafı’na ait ev için temessük verildiği Mahmiye-i Galata’ya tâbi‘ kasaba-i Tophane mahallâtından merhûm Alipaşa mahallesi sâkinelerinden İsmihan Hatun bt. Ali Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânînin imzâsıyla mümzâ ve hatemi ile mahtûm ve târîh-i kitâb senesi Rebî‘ülâhiri’nin evâili ile müverrah tezkiresi ile meclis-i şer‘-i şerîfe gelip takrîr-i kelâm edip evkāf-ı mezbûreden olup mahale-i mezbûrede vâki‘ bir tarafdan Kapıcı Mustafa Bey b. ( ) mülküne ve bir tarafdan yine Haremeyn-i Şerîfeyn Evkāfı’na ve bir tarafdan Canfeda Hatun bt. ( ) sâkine olduğu menzile ve bir tarafdan Merve Hatun bt. ( ) sâkine olduğu hâneye müntehî olan menzil bundan akdem îcâr olunmak lâzım geldikde târîh-i mezbûrdan yevmî ikişer akçe icâre-i müeccele ve iki bin akçe icâre-i mu‘accele ile mütevellî-i mezbûr bana îcâr ve ben dahi cümle meremmâtını kendi mâlımdan etmek üzere ber-vech-i mezkûr istîcâr ve kabûl eylediğimden icâre-i mu‘accelesi olan iki bin nakd râyicü’l-vakt akçeyi mütevellî-i mezbûr yedimden vakf için alıp kabz edip tasarrufum için yedime tezkire vermişidi kıbel-i şer‘den dahi temessük taleb ederim dedikde mütevellî-i mezbûrun tezkiresine nazar olunup min-külli’l-vücûh mezbûr müste’cir-i mezbûre İsmihan’ın takrîrine mutâbık bulunmağın mâ-hüve’l-vâkı‘ bi’t-taleb ketb olundu. Tahrîren fî-evâsıtı şehri Şa‘bâni’l-mu‘azzam li-sene ışrîn ve elf. Şühûdü’l-hâl: Hasan Çavuş b. Mustafa, Hızır b. ( ) el-Kâtib, Yusuf b. Abdullah, Mehmed Bey b. Hüseyin, Zülfikar b. Abdullah.