Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 108 Hüküm no: 47 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’nın mütevellisinin dava ettiği evin Fatma Hatun b. Abdülvahhab’a ait olduğu Mahmiye-i Kostantıniyye’de Haremeyn-i Şerîfeyn -şerrefehallâhu te‘âlâ- Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed el-bevvâb-ı sultânî meclis-i şer‘-i şerîfe gelip menzil-i âti’z-zikre vâzı‘atü’l-yed olan fahrü’l-muhadderât ve zahrü’l-muvakkarât Fâtıma Hatun b. Abdülvahhab tarafından husûs-ı âti’l-beyâna vekîl olup vekâleti nehc-i şer‘î üzere sadrî oğulları fahrü’l-emâcid ve’l-ekârim Mehmed Ağa b. Abdüddâim el-müteveffâ ve zahrü’l-eşbâh Hüseyin Ağa b. Abdullah et-Tavâşî şehâdetleri ile sâbite olup Dergâh-ı âlî -dâme mahfûfen bi’l-me‘âlî- müteferrikalarından olan kıdvetü’l-emâcid ve’l-a‘yân Mustafa Ağa b. Abdurrahman mahzarında takrîr-i da‘vâ kılıp mahmiye-i mezbûrede Pîrîağa mahallesinde vâki‘ hudûdu vakfiyesinde mastûre inde’l-cîrân ma‘lûme büyût-ı müte‘addideyi müştemil olup hâlâ müvekkile-i mûmâ-ileyhâ yedinde olan menzil bundan akdem mirâhor-ı kebîr iken vefât eden merhûm Ahmed Ağa’nın mülkü olup merhûm-ı mezbûr menzil-i mesfûru hâl-i sıhhatinde hamse ve elf Şevvâli’nde süknâsını evvelâ kendi nefsine ba‘dehû karındaşı Mahmud Ağa’ya ve onun evlâdına ve ba‘de’l-inkırâz îcâr olunup ücreti Medîne-i Münevvere fukarâsına verilmesini şart etmiş idi mezbûr Ahmed Ağa vefât edip nevbet-i süknâ mezkûr Mahmud Ağa’ya intikāl edip sâkin iken âhar diyâra gitmek ile hakk-ı nevbet Medîne-i Münevvere fukarâsının olmuş iken müvekkile-i müşârun-ileyhâ menzil-i mezbûra ne vechile vaz‘-ı yed etmişdir suâl olunup kasr-ı yed ettirilmesin matlûbumdur dedikde gıbbe’s-suâl mûmâ-ileyh Mustafa Ağa cevâb verip fi’l-vâki‘ menzil-i mersûm merhûm-ı merkūm Ahmed Ağa’nın mülkü olup lâkin vakfetmeyip mülkü iken vefât edip menzil-i mezbûr inhisâr üzere vârisi olan karındaşı mezkûr Mahmud Ağa’ya irs-i şer‘île intikāl edip ba‘dehû müvekkilem mûmâ-ileyhâ Fâtıma Hatun’un zevci iken vefât edip merhûm Ali Ağa hâl-i sıhhatinde menzil-i mesfûru cümle tevâbi‘i ile mezbûr Mahmud Ağa’dan bey‘-i bâtt-ı sahîh-i şer‘î ile ibtiyâ‘ ve iştirâ edip merkūm Ali Ağa vefât oldukda zevcesi olan müvekkilem müşârun-ileyhâ Fâtıma Hatun’dan gayrı vârisi olmamağın metrûkâtı cânib-i beytülmâlden zabt olunup menzil-i mesfûr mîrî tarafından müvekkilem mezbûreye rub‘ hisse-i şer‘iyyesi ve mehr-i müecceli mukābelesinde verilip müvekkilem dahi menzil-i merkūmu sitte aşere ve elf Muharremü’l-harâmı’nda vakf-ı sahîh-i şer‘î edip süknâsını evvelâ kendiye ve ba‘de vefâtihâ oğlu Mehmed Ağa’ya ve onun evlâdına ve evlâd-ı evlâdına ba‘de’l-inkırâz ücretini Medîne-i Münevvere fukarâsına şart eyledi hâlâ kendisi şart-ı mezkûru üzere sâkinedir deyu mazmûnu sâbit ve takrîrine muvâfık ve târîh-i mezkûrda mahmiye-i mezbûre kādısı olan a‘lemü’l-ulemâ’i’l-mütebahhirîn efdalü’l-fudelâi’l-müteverri‘în yenbû‘ü’l-fazl ve’l-yakīn hazret-i Mehmed Efendi b. el-müvellâ el-merhûm Abdülgani Efendi [13b] Rumeli kazaskeri olan a‘lemü’l-ulemâ’i’l-izâm efdalü’l-fudelâi’l-fihâm Esad Efendi imzâları ile mümzâ ve hatimleri ile mahtûm vakıfnâme ibrâz edicek zikr olunan vakıfnâme muhakkak mazmûnu mukarrer kılındıkdan sonra mûcebince ibkā mâ-kâne alâ-mâ-kân kılınıp bu vesîka-i enîka alâ-mâ-hüve’l-hakīka ketb ve cem‘ ve yed-i tâlibe vaz‘ ve def‘ olundu. Tahrîren fî-evâili Zilka‘deti’ş-şerîfe li-sene ışrîn ve elf. Şühûdü’l-hâl: Fahrü’l-ekârim ve’l-emâcid Mustafa Ağa b. Abdülmâcid el-müteferrika, fahrü’l-emâsil ve’l-akrân Hüseyin Ağa b. Abdülmennan ez-zevvâku’s-sultânî, umdetü erbâbi’l-kalem ve’l-imlâ’ Hüseyin Efendi b. Murtaza el-kâtib, fahrü’l-cüyûş Mehmed Çavuş b. Abdüssamed, fahrü’l-akrân Mehmed Bey b. İsa el-bevvâbü’s-sultânî, zübdetü erbâbü’l-kalem ve’l-kitâb Mehmed Efendi b. Abdülvahhab, Süleyman Bey b. Abdullah el-bevvâbü’s-sultânî, Ömer Bey b. Abdullah el-bevvâbü’s-sultânî, Yusuf Bey b. Abdullah el-bevvâbü’s-sultânî, Muharrem Bey b. Abdullah el-cündî, Derviş b. Abdullah el-bevvâbü’s-sultânî, Himmet Efendi b. ( ) el-müderris, Hasan Efendi el-müderris, Hasan Bey el-Hâfız el-cündî, Mustafa Bey b. Dursun el-cündî, Nasuh Çavuş b. Abdullah eş-Şehîr bi Derzibaşı, Ali Bey b. Abdullah el-bevvâbü’s-sultânî, Elmas Ağa b. Abdullah et-Tavâşî ve gayruhüm.