Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 118 Hüküm no: 54 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Güranî mahallesindeki Mehmed Efendi b. Şücâ’nın oturduğu evin tamiri için keşif yapıldığı Bi’l-fi‘il Âsitâne-i sa‘âdet-i aşiyân’da reisü’l-küttâb olan umdetü ashâbi’s-seyf ve’l-kalem zübdetü erbâbi’t-tahrîr ve’r-rakam câmi‘ü’l-mehâmidi’l-aliyye müstecmi‘ü’l-mekârimi’s-seniyye zü’l-kadri’l-âli ve’l-izzi’s-sâmî el-mahfûf bi-sunûfi avâtıfi’l-meliki’l-emced Mecid Mehmed Efendi b. Şücâ‘ hazretleri meclis-i şer‘-i şerîf-i lâzımü’t-teşrîfde takrîr-i kelâm ve ta‘bîr ani’l-merâm edip Haremeyn-i Muhteremeyn Evkāfı’ndan olup mahmiye-i İstanbul’da Şeyh Ebü’l-vefâ kuddise sırruhü’l-azîz hazretlerinin türbe-i şerîfeleri kurbünde Gürânî mahallesinde inde’l-ahâlî ve’l-cîrân ma‘lûmü’l-hudûd olup icâre-i mu‘accele ve yevmî on beş akçe ücret-i müeccele ile tasarrufumda olan menzilin üç odası ve matbahı ve kilârı ve kenîfi bi’l-külliye harâba müşrif olup meremmet ile ta‘mîri mümkün olmayıp müceddeden binâ olunması lâzım olmağın kendi mâlımdan müceddeden binâ etsem gerek hâlâ cânib-i şer‘den üzerine varılıp zikr olunan odaların ve matbahın ve kenîfin nıkzı ne mikdâr eder ve ebniye-i merkūmenin müceddeden binâsına ne mikdâr akçe kifâyet eder tahmîn olunup semen-i nıkzı vakfın mülkü olup benim kendi mâlımdan sarf ettiğim icâre-i mu‘accele olmak üzere izin verilmek taleb ederim dedikde bi’l-fi‘il Atebe-i aliyye’de mi‘mârbaşı olan fahrü’l-emâcid ve’l-ekârim Mehmed Ağa b. Abdüddâim zeyl-i sütûrda mastûretü’l-esâmî olan bî-garaz Müslimîn ile üzerine varılıp evkāf-ı mezbûre mütevellîsi olan Hasan Bey b. Mehmed mahzarında keşf olun[duk]da fi’l-vâki‘ emâkin-i mezbûrenin vech-i meşrûh üzere bi’l-cümle harâba müşrifi mukarrer olup taşının ve kiremidin ve kerestesinin ve bi’l-cümle harâba müşrif olan ebniyenin nıkzı kırk bin akçe ancak eder ve ebniye-i merkūme tecdîdine ancak yüz yirmi bin akçe kifâyet eder deyu mi‘mâr-ı müşârun-ileyh ve sâir bî-garaz Müslimîn ittifâk ettiklerinde zikr olunan mevâzi‘i tecdîden binâya ve kırk bin akçeden ziyâde ne gider ise vakfa icâre-i mu‘accele olmak üzere mûmâ-ileyh efendiye savb-ı şer‘den izin verilip mâ-hüve’l-vâkı‘ gıbbe’t-taleb ketb olundu. Tahrîren fî-evâili Zilka‘deti’ş-şerîfe li-sene seb‘a aşere ve elf. Şühûdü’l-hâl: Fahrü’l-a‘yân Hüseyin Efendi b. Bayezid el-kâtib-i bevvâbân, Hüseyin Efendi b. Hayreddin, Hasan Ağa b. Abdülmennan, Kasım Çavuş b. Abdullah, Hamza Bey b. Yusuf el-bevvâb.