Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 119 Hüküm no: 55 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumelihisarı dizdarı Hüseyin Ağa’ya, kaleye zararı olduğu iddiasıyla el koyduğu mahzeni vakfa iade etmesinin tenbih olunduğu Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hasan Bey b. Mehmed nâm bevvâb-ı sultânî meclis-i şer‘-i şerîfde takrîr-i kelâm edip bundan akdem müteveffâ olan Ali b. Abdullah nâm râcil mahrûse-i Galata tevâbi‘inden Rumeli hisârı dâhilinde arz-ı mîrî üzerinde binâ edip zevcesi Âişe bt. Hüseyin nâm hatundan sonra Medîne-i Münevvere fukarâsına vakf ve şart ettiği mahzen nice müddetden beri vakf için zabt olunur iken hâlâ kal‘a-i mezbûre dizdârı olan Hüseyin Ağa kal‘aya zararı vardır deyu içinde olan on aded kadozu ve iki kadoz dolusu tuzu ve sâir menkūlâtı taşra (dışarı) bırağıp hilâf-ı şer‘ mahzen-i mezbûru tasarruf edip vakfa gadr etmişdir. Husûs-ı mezbûr için kıbel-i şer‘den âdem irsâl olunup fi’l-vâki‘ kal‘aya ve topları zararı var mıdır keşf ve müşâhede olunmasın taleb ederin dedikde cânib-i şer‘den fahrü’l-müderrisîn Mevlânâ Mahmud Efendi ve hâssa mi‘mârlardan üstâd Ali b. Halil irsâl olunup onlar dahi zeyl-i kitâbda mastûrü’l-esâmî olan ehl-i vukūf Müslimânlar ile mahzen-i mezbûr üzerine varıp dizdâr-ı mezbûr mahzarında keşf ve müşâhede ettiklerinde mahzen-i mezbûrun kal‘a-i mezbûreye ve toplarına zararı olmadığına mi‘mâr-ı mezbûr ve sâir Müslimîn ittifâk eylediklerinde ittifâklarını mevlânâ-yı mezbûr mahallinde tahrîr ve mahzen-i mezbûrdan kasr-ı yed eyleye deyu dizdâr-ı merkūma tenbîh ettiğini gelip meclis-i şer‘de ihbâr etmeğin mâ-vaka‘a bi’t-taleb ketb olunup yed-i tâlibine def‘ olundu. Tahrîren fî-şehri Ramazân sene sitte aşer ve elf. Şühûdü’l-hâl: Şa‘ban Bey b. ( ) el-Cündî, Mustafa b. Ferhad, Hasan b. Yusuf, Ali b. Kaya, Ali b. Mustafa, Ferhad b. Abdullah, Ömer Bey b. Mustafa, Hüseyin b. Mustafa ve gayruhüm.