Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 119 Hüküm no: 56 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Celâl Efendi b. Şeyh Yakub vakfiyesi Mâ fîhi mine’l-vakfi’ş-şer‘î ve’l-habsi’s-sarîhi’l-mer‘î vaka‘a ledeyye ale’l-uslûbi’l-kadîm ve sadera beyne yedeyye ale’n-nehci’l-müstakīm nemmekahu’l-fakīr Mehmed b. Abdülkerîm el-Müvellâ bi-kasabati Beşiktaş hilâfeten ufiye anhümâ Elhamdülillâhi rabbi’l-erbâb mâliki’r-rikāb ve’s-salâtü ve’s-selâmü alâ-efdali men ûtiye’l-hikmetü ve fazlü’l-hitâb ve alâ-âlihi ve eshâbihi hayri’l-âl ve hayri’l-ashâb ammâ ba‘d. Bu vakfiyye-i sahîha-i şer‘iyyenin sâhibi ve hayrât ü hasenâtın tâlibi ve râgıbı kutbü’l-ârifîn eş-Şeyh Celâl Efendi b. eş-Şeyh Yakub el-mu‘idî vaktâki izzet cenâbından vâsıl olan atâyâ-yı celîliyye hadd ü ad ile mahdûd ve ma‘dûd olmadığını tefekkür edip ve sebeb-i ecr-i cezîl olacak nesne savbına tevcîh-i inân ve azîmet edip mahmiye-i Galata muzâfâtından kasaba-i Beşiktaş mahallâtından merhûm ve mağfûrun-leh Sultân Süleyman Han aleyhi’r-rahmetü ve’l-gufrân mahallesinde vâki‘ bir tarafı Râziye Hatun mülküne ve bir tarafı Nesli Hatun mülküne ve iki tarafı tarîk-ı âmma müntehî olan üç bâb tahtânî ve iki bâb fevkānî evleri ve muhavvatayı ve bi’r-i mâ’î ve kenîfi ve cüneyneyi müştemil olan mülk menzilini vakf-ı sahîh-i şer‘î ve habs-i sarîh-i mer‘î edip süknâsını evvelâ nefsine şart etti mâdâm ki kayd-ı hayâtda ola ba‘dehû evlâdına ve evlâd-ı evlâdına batnen ba‘de batnin ve ba‘de’l-inkırâz hâlâ taht-ı nikâhında olan fahrü’l-muhadderât Hasnâ Hatun bt. Abdullah kayd-ı hayâtda oldukça sâkine ola ve ba‘dehâ vâkıf-ı mezbûrun utekāsına ve evlâd-ı utekāsına şart eyledi. Ve ba‘de’l-inkırâz menzil-i merkūm îcâr olunup hâsıl olan ücret Medîne-i münevvere fukarâsına harc ü sarf oluna deyu vakfedip ve Dergâh-ı âlî çavuşlarından fahrü’l-akrân Ahmed Çavuş b. Nasuh nâm kimesneyi li-ecli’t-tescîl hasbî mütevellî edip dahî vakf-ı mezbûru mütevellî-yi mezkûra teslîm-i şer‘î ile teslîm edip ol dahî kabz ve tesellüm eyledi. Vâkıf-ı mezbûrun vakfı emri tamâm oldukdan sonra vâkıf-ı mezbûr vakf-ı mesfûrdan rücû‘ edip İmâm-ı A‘zam hümâm-ı efham Hazret-i Ebî Hanîfe katında lüzûm mün‘adimdir deyu da‘vâ ve kemâ kân mülküne idhâli murâd etdikde mütevellî-yi mezbûr dahî redden imtinâ‘ edip İmâm Ebî Yûsuf ve İmâm Muhammed katlarında vakf ü lüzûm vakf-ı mütelâzımâtdandır deyu muhâsama edip hâkime murâfa‘a olup ondan hükm talep etdikde hâkim-i mûmâ-ileyh dahî meşâyih-i a‘lâm beyninde cârî olan ihtilâfa âlim olduğu halde imâmeyn-i müşârun-ileyhimâ kavilleri üzere vakf-ı mezbûrun sıhhat ve lüzûmuna hükm-i şer‘î ile hükmedip mahkûmün-bih olmakla mecma‘-ı aleyh olup min-ba‘d naks ve nakzına mecâl muhâl ve tağyîr ve tebdîline imkân mümteni‘u’l-ihtimâl oldu. Tahrîren fî evâsıtı Şa‘bani’l-mu‘azzam li-sene ışrîn ve elf Şühûdü’l-hâl: Yakub Efendi b. Mahmud, Ahmed Efendi el-müsta‘id, Süleyman Efendi b. Gıyaseddin, Yusuf Halîfe b. Pîr Ali el-müezzin, Halîfe Efendi b. Mehmed el-mülâzım, Ali Çelebi b. Mehmed, Piyâle Bey b. Abdullah, Mehmed Çelebi b. Seyfullah, Mehmed Halife b. Mehmed Çelebi el-müezzin, Ali Beşe b. Abdullah, el-Hâc Ca‘fer b. Abdullah, Resul b. Mesud, Ali Çelebi b. Abdullah, Ali Beşe el-muhzır