Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 130 Hüküm no: 66 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Ali Ağa b. Abdüddâim’in Haremeyn Vakfı’na ait oturduğu evde yaptığı tadilatlardan dolayı keşif yapıldığı Dergâh-ı âlî müteferrikalarından fahrü’l-ekârim Hoca Ali Ağa b. Abdüddâim meclis-i şer‘a gelip [Medîne-i] Münevvere Evkāfı’ndan mahmiye-i İstanbul’da Nahılbend mahallesinde vâki‘ bir tarafı Kâtib İbrahim Efendi mülküne ve bir tarafı Mahmud Bey Vakfı’na ve bir tarafı Emine Hatun mülküne ve bir tarafı tarîk-i âmma müntehî fevkānî ve tahtânî iki bâb evleri ve kenîfi muhtevî olup Esmâ Hatun bt. Abdullah vakfettiği menzili bundan akdem ben bin on dokuz Şevvâli’nde üç bin akçe icâre-i mu‘accele ve yevmî üç akçe icâre-i müeccele ile evkāf-ı mezbûre mütevellîsi fahrü’l-bevvâbîn el-Hâc Hasan Bey b. Mehmed’den istîcâr edip ve içinde kendi mâlım ile her ne binâ edersem vakfın olup harcım ücret-i mu‘acceleme zam olunmak üzere binâya izin alıp ba‘dehû menzil-i mezbûrda bir fevkānî oda harâba müşrif ve tecdîde muhtâc olup vakfın müsâ‘adesi olmamağın sene-i mezbûre Zilhiccesi’nde mütevellî-i merkūm ve müfettiş-i vakf-ı mersûm izin ve icâzetleri üzere kendi mâlım ile tecdîd edip ve <> müceddeden bir fevkānî oda ve bir mağsel ve bir fırın ve yüz otuz zirâ‘ taş duvar ve iki bâb kenîf binâ ve ihdâs ve bir odanın dahi dolma duvarlarını ve tahta döşemelerini termîm ettiğimden sonra üzerine varılıp keşf olundukda mukaddemâ takvîm olunan iki bin akçe naksından mâ‘adâ kendi mâlımdan harc ettiğim meblağın on sekiz bin beş yüz akçeye tahammülü olduğu hüccet olunup menzil-i mezbûrda icâre-i mu‘accelem yirmi bir bin beş yüz akçe olmuş idi ba‘dehû yine menzil-i mezbûrda kendi mâlım ile bazı levâhık dahi ihdâs ettim hâlâ dahi cânib-i şer‘-i şerîfden yine üzerine varılıp ona harc ettiğim akçemin dahi ne mikdâra tahammülü olduğu mahallinde tahrîr olunmak matlûbumdur demeğin hâssa mi‘mârlardan üstâd Ali b. Halil ile ve sâir ehl-i vukūf Müslimânlar ile menzil-i mezbûrun üzerine varılıp keşf olundukda dâhiliyyesinde olan cüneynenin etrâf-ı selâsesinde tûlen yirmi zirâ‘ trabzan ve bir tarafdan tûlen on ve arzen iki zirâ‘ tahta-pûş dâhiliyyesinde selâmlık odasının tûlen beş ve kadden altı bi-hesâb-ı şatrancî otuz zirâ‘ ve kalınlığı buçuk zirâ‘ dolma duvarı ve tûlen beş ve kadden dört zirâ‘ masandırası ve penceresinin demiri ve kapısı ve iki aded penceresinin camları ve dört duvarının sıvası tecdîden ihdâs olunmuş bulunup mi‘mâr-ı mezkûr ve sâir Müslimîn bu cümleye harc olunan meblağ üç bin üç yüz elli akçeye mütehammildir deyu ittifâk üzere haber verdiklerinde menzil-i mezbûrda icâre-i mu‘accelesi cem‘an yirmi dört bin sekiz yüz elli akçe oldukdan sonra mütevellî-i merkūm müste’cir-i mûmâ-ileyhe târîh-i kitâbdan sonra zikr olunan yevmî üç akçe ücret-i müeccelenin yevmî bir akçesini menzil-i mezbûrun [21b] meremmetine sarf edip dahi bâkī kalan yevmî iki akçeyi mâh be-mâh cânib-i vakfa edâ etmesine izin vericek mâ-hüve’l-vâkı‘ alâ-vukū‘ihî bi’t-taleb ketb olundu. Tahrîren fî-Cemâziyelâhire sene ihdâ ve ışrîn ve elf. Şühûdü’l-hâl: Halil Bey b. Abdullah, el-bevvâbü’s-sultânî, Mehmed Bey b. Abdullah, el-bevvâbü’s-sultânî, Ahmed Çelebi b. Süleyman el-bevvâbü’s-sultânî, Ahmed Bey b. Hüseyin es-serrâcü’l-hâssa, Ahmed Bey b. Mahmed es-serrâcü’l-hâssa, Kurt Bey b. Abdullah, el-bevvâbü’s-sultânî, Yusuf Bey b. Abdullah, el-bevvâbü’s-sultânî, Mevlânâ Yusuf el-müezzin ve gayruhüm mine’l-hâzırîn.