Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 132 Hüküm no: 67 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in oturduğu evi vakfedenin şartı gereği Ayşe bt. Hüseyin’e teslim etmesi İşbu hâmiletü’l-kitâb Âişe bt. Hüseyin nâm hatun meclis-i şer‘-i şerîfe gelip menzil-i âti’l-beyâna vâzı‘ü’l-yed olduğu şer‘an sâbit olan Ahmed Bey b. ( ) nâm serrâc-ı hâss mahzarında takrîr-i da‘vâ edip bundan akdem ceddem Serrâc Murad Bey mahmiye-i İstanbul’da Nahılbend mahallesinde vâki‘ bir cânibi Kapı Ağası Vakfı’na ve bir cânibi tarîk-i hâssa ve iki cânibi tarîk-i âmma müntehî olup iki bâb fevkānî ve bir bâb tahtânî odaları ve bir sofayı müştemil menzili ve sâir büyût-ı müte‘addideyi hâvî olan mülk dârını vakıf ve süknâsını evlâdına ve evlâd-ı evlâdına ve ba‘de’l-inkırâz Medîne-i Münevvere fukarâsına şart edip ber-mûceb-i şart-ı vâkıf evlâd ve evlâd-ı evlâd sâkin ola gelip hâlâ hakk-ı süknâ bana intikāl etmiş iken menzil-i mezbûre merkūm Ahmed Bey bî-vech vaz‘-ı yed edip tasarruf eder şer‘le görülüp yedi kasr olunmak matlûbumdur dedikde gıbbe’s-suâl merkūm Ahmed Bey fi’l-vâki‘ dâr-ı mezkûreyi merkūme Âişe’nin ceddi Serrâc Murad vakıf ve süknâsını evlâdına ve evlâd-ı evlâdına şart etti lâkin evlâddan olup mezkûre Âişe’nin vâlidesi olan Aynî Hatun bt. Abdi’nin nevbet-i tasarrufunda menzil-i mezbûr harâba müşrif olup ta‘mîr ve termîmine cânib-i vakıfda ve mezbûre Aynî’de kudret olmamak ile mütevellî-i vakf-ı mezbûr olan Süleyman nâm kimesne nâzır-ı vakf ma‘rifeti ile menzil-i mezbûru bana bundan akdem yevmî üç akçe ücret-i müeccele ile îcâr edip harcım ücret-i müecceleye mahsûb olmak üzere mâlım ile ta‘mîr ve termîme izin verilip ben dahi kendi mâlımdan dört bin altı yüz akçe harc edip ta‘mîr ve termîm ettim ücretle harcım henüz istîfâ etmedim hîn-i istîfâya değin sâkin olurum deyu cevâb verip lâkin takrîr-i muharreri üzere mütevellî ve nâzırın îcâr ve izinleri olduğuna yedinde temessük olmayıp ve alınması ile keşf için cânib-i şer‘-i şerîfden Mevlânâ Mehmed Efendi ve hâssa mi‘mârlardan üstâd Ali irsâl olunup menzil-i mezbûrun üzerine varılıp keşf ettiklerinde merkūm Ahmed Bey’in ettiği ta‘mîr ve termîmin harcı ancak bin beş yüz akçeye mütehammil olduğun mevlânâ-yı mezbûr mahallinden tahrîr ve gelip meclis-i şer‘de beyân ve takrîr etmeğin menzil-i mezbûru ber-mûceb-i şart-ı vâkıf mezbûre Âişe Hatun’a teslîm etmek üzere merkūm Ahmed Bey’e tenbîh olunup mâ-hüve’l-vâkı‘ bi’t-taleb ketb olundu. Tahrîren fî-evâsıtı Cemâziyelâhire sene ihdâ ve ışrîn ve elf. Şühûdü’l-hâl: Abdurrahman Halîfe el-imâm, Atâullah b. İbrahim el-müezzin, Yusuf b. Abdurrahman el-müezzin, Kurt Bey b. Abdullah el-bevvâbü’s-sultânî, Ali Bey b. Mehmed el-bevvâbü’s-sultânî, Mustafa Bey b. ( ) et-tabbâhü’l-hâs, Halil Bey b. ( ), Üstâd Bâli b. ( ).