Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 134 Hüküm no: 69 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulbâki Efendi b. Kurt’un Haremeyn Evkafı’na ait Nişancı Cafer Çelebi mahallesindeki evi kiralaması Haremeyn-i Şerîfeyn -şerrefehallâhu te‘âlâ- Evkāfı mütevellîsi el-Hâc Hasan Bey b. Mehmed meclis-i şer‘a gelip işbu hâmilü’l-kitâb fahrü’l-kuzât Abdulbâki Efendi b. Kurt mahzarında ikrâr u i‘tirâf edip mahmiye-i İstanbul’da Nişancı Ca‘fer Çelebi mahallesinde vâki‘ bir tarafı Hasan Çavuş mülküne ve iki tarafı Sinan Bey mülküne ve bir tarafı tarîk-i âmma müntehî bir bâb oda ve bir fırını ve muhavvatayı müştemil menzili bundan akdem Ferhad b. Abdullah nâm kimesne vakfedip süknâsını evvelâ nefsine ba‘dehû zevcesi ( ) ba‘dehâ Medîne-i Münevvere fukarâsına şart eylemiş idi mukaddemâ kendi vefât edip ba‘dehû mezbûre ( ) mutasarrıfe iken hâlâ ol dahi fevt olup şart-ı vâkıf üzere nevbet-i tasarruf Medîne fukarâsına gelmişdir eyle olsa menzil-i mezbûru tevliyetim hasebiyle ba‘de inkıtâ‘i’r-ragabât merkūm Abdulbâki Efendi’ye bin akçe icâre-i mu‘accele-i makbûz ve yevmî iki akçe icâre-i müeccele ile îcâr ettim ol dahi kabûl [ve] istîcâr eyledikden sonra zikr olunan iki akçe ücret-i müeccelenin yevmî bir akçesi menzil-i mezbûr meremmetine sarf etmeğe izin verdim ba‘de’l-yevm ücret-i müeccele-i merkūmenin yevmî bir akçesin meremmete sarf ve her ayda otuz akçesin cânib-i vakfa edâ edip mutasarrıf oldukdan sonra mukırr-ı mezbûru ikrâr-ı meşrûhunda mûmâ-ileyh Abdulbâki Efendi dahi bi’l-müvâcehe tasdîk edicek mâ-hüve’l-vâkı‘ bi’t-taleb ketb olundu. Tahrîren fîevâili Ramazâni’l-mübârek li-sene ihdâ ve ışrîn ve elf. Şühûdü’l-hâl: Mehmed Efendi b. İbrahim el-müderris, Abdurrahman Efendi b. İbrahim el-müderris, İbrahim Çelebi b. Abdülhalil, Ali Çelebi b. Halil el-mi‘mârü’l-hâssa, Ferhad Bey b. Abdullah el-bevvâbü’s-sultânî, Mustafa Bey b. Abdullah el-bevvâbü’s-sultânî, Ali Bey b. ( ) Hasan Bey b. Abdullah.