Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 137 Hüküm no: 75 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Bey b. Ahmed Paşa’nın Haremeyn Vakfı’na olan borcuna Bayezid b. Abdullah’ın kefil olduğu Mahmiye-i İstanbul’da Cezerî Kasımpaşa mahallesinde sâkin iftihârü’l-ümerâi’l-kirâm Murad Bey b. el-merhûm Ahmed Paşa meclis-i şer‘-i şerîf ve mahfil-i dîn-i münîfe gelip mahmiye-i mezbûrede Haremeyn-i Şerîfeyn -şerrefehallâhu te‘âlâ- Evkāfı nükūdunun mütevellîsi olan işbu râfi‘ü’l-kitâb fahrü’l-akrân Mustafa Bey b. Mehmed el-bevvâbü’s-sultânî mahzarında bi’t-tav‘i’s-sâf ikrâr u i‘tirâf edip evkāf-ı mezbûre mâlından karz-ı şer‘îden zimmetimde lâzımü’l-edâ doksan bin akçe olup ve çuka bahâsından dahi târîh-i kitâbdan sene tamâmına müeccelen dokuz bin akçe olup mukābelesinde mülküm olan kırmızı kadîfe üzere iki başlığı ile on dokuz yıldızlı bir cevherî murassa‘ kuşak ve hürmüz incisinden doksan dokuz aded bir tesbîh ve zümrüd-i atîkden on altı aded bir tesbîh mütevellî-i mezbûrun yedinde rehn-i makbûzdur dedikde mukırr-ı mûmâ-ileyhi ikrâr-ı meşrûhunda mütevellî-i merkūm dahi vicâhen tasdîk ve şifâhen tahkīk ettikden sonra zikr olunan meblağ-ı müeccel dokuz bin akçeye mahalle-i mezbûre sâkinlerinden işbu hâzır bi’l-meclis olan el-Hâc Bayezid b. Abdullah el-cündî emr ve kabûlü hâviye kefâletle kefîl olmağın mâ-hüve’l-vâkı‘ bi’t-taleb ketb ve cem‘ ve yed-i tâlibe vaz‘ ve def‘ olundu. Tahrîren fî-gurreti şehri Ramazâni’l-mübârek li-sene ihdâ ve ışrîn ve elf. Şühûdü’l-hâl: Mustafa Bey b. Abdullah mütevellî-i Mustafa Paşa el-merhûm, Mehmed b. el-Hâc Salih, Mahmud Çelebi b. ( ) el-bevvâbü’s-sultânî, Mehmed Bey b. Abdullah el-bevvâbü’s-sultânî, Rıdvan b. Abdullah el-hayyât, Üstâd Süleyman b. ( ) el-hayyât, el-Hâc Hasan Bey b. Mehmed el-bevvâbü’s-sultânî, Mehmed Çelebi b. el-Hâc Mustafa er-reisü’l-hâs ve gayruhüm mine’l-hâzırîn.