Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 138 Hüküm no: 76 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’na ait arsanın üzerindeki enkazı ile beraber Ayasofya-i kebir imamı Mehmed b. Cafer’e kiralanması Oldur ki, Vakt ü evânında ferîd-i asr-ı zaman ve vâhid-i dehr ü deverân bakiyye-i selef ve mukallid-i halef olmak ile câmi‘i Arabî-i cihân olup mu‘allim-i sultân ve şeyhülislâm ve hallâl-i müşkilât-ı ehl-i zaman iken dâric-i medâric-i kurb-i melik-i mennân olan firdevs-mekîn-i rızâ-karîn a‘nî bihi’l-müvellâ el-merhûm Sadeddin -es‘adehu lillâhi te‘âlâ yevmi’d-dîn- hazretlerinin necl-i mükerremleri olup her biri dürr-i semîn sıdk-ı ilm-i mübîn dîn-i kal‘a-i gevher-nigîn fazl u yakīn olup belki erba‘a-i seyyâre gibi eknâb-ı merkez-i saltanat-ı âl-i Osman ibkāhâ ve eyyede lillâhi bi-nasrihi ilâ yevmi’l-mizânda neyyir ve mebrûr olmak ile ekālim-i seb‘ada rûşen ve şühûr olup ta‘rîf ve tavsîfden mustağniler olan mefāhirü’l-mevâli’l-izâm Şeyhülislâm Mehmed Efendi hazretleri ve Esad Efendi ve Abdülaziz Efendi ve Salih Efendi hazretleri cânib-i şerîflerinden ikrâr-ı âti’l-bayâna vekîl olup vekâletleri nehc-i şer‘î üzere sâbite olan kıdvetü’l-müderrisîni’l-kirâm umdetü’l-muhakkıkīni’l-fihâm Ayasofya-i kebîr medresesi müderrisi Şerif Efendi hazretleri meclis-i şer‘-i şerîf ve mahfil-i dîn-i münîfde işbu hâfızü’l-kitâbi’l-ârî ani’l-irtiyâb akrâu kurrâi’…? Ayasofya-i kebîr imâmı Mehmed b. Ca‘fer mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp müvekkillerim müşârun-ileyhim -esbeğallâhü ni‘amehû aleyhim- Medîne-i Münevvere ve Taybe-i tayyibe-i mutahhara evkāfından olup mahmiye-i İstanbul’da Ayasofya-i kebîr kurbünde bir tarafı Şeyh Erdebilî Sinan Zâviyesi’ne ve üç tarafı tarîk-i âmma müntehî tûlen ve arzen bazı masandı[ra]ları ile cem‘an bi-hesâb-ı şatrancî iki yüz doksan beş zirâ‘ arz üzere vâki‘ olup yine şeyh-i merkūm kızı Emine Hatun vakfettiği menzil arsası <<üzere>> olan arz-ı mezbûre birle icâre-i mu‘accele ve müeccele ile ber-vech-i iştirâk taht-ı tasarruflarında iken muhterik olmuş idi hâlâ arz-ı mezbûreyi üzerinde olan nıkzı ile imâm-ı merkūm Mehmed Efendi’ye evkāf-ı mezbûre mütevellîsi olup işbu hâzır bi’l-meclis olan fahr-i bevvâbân-ı bâb-ı mümecced el-Hâc Hasan Bey b. Mehmed ma‘rifeti ile ferâğ edip ol dahi kabûl etti deyip imâm-ı merkūm dahi bi’l-müvâcehe tasdîk ettikden sonra hâsseten nıkzı mersûm müntefe‘un-bih olduğu ma‘lûm olmağın arz-ı mezbûrenin mukāta‘ası her senede üç yüz altmış akçe iken kırk akçe dahi ziyâde etmekle mukāta‘ası dört yüz akçe edip dahi üzerine kendi mâlıyla nefsi için ebniye-i cedîde ihdâsına mütevellî-i mesfûrdan izin taleb edip ol dahi minvâl-i meşrûh üzere izin verip cânib-i şer‘-i şerîfden dahi icâzet ve temessük taleb olunmağın iltimâsları üzere bu vesîka-i enîka alâ-mâ-hüve’l-hakīka ketb ve cem‘ ve yed-i tâlibe def‘ ve vaz‘ olundu. Tahrîren fi’l-yevmi’l-hâmis ve ışrîn min-şehri Ramazâni’l-mübârek li-sene ihdâ ve’l-ışrîn ve elf. Şühûdü’l-hâl: Umdetü’s-sâlikîn eş-Şeyh Hasan Efendi Şeyhü’z-zâviyeti’l-mezbûre, Mehmed Efendi b. İbrahim el-müderris, Abdurrahman Çelebi b. İbrahim el-müderris, Abdurrahman Efendi b. eş-Şeyh Abdullah el-müderris, Ali Çavuş b. Abdullah, Kurt Ali Çelebi b. Abdullah, Ahmed b. Mustafa el-müezzin bi-Ayasofya, Zülfikar b. Gülabî el-müezzin, Receb b. Abdullah el-müezzin, Üstâd Mahmud b. ( ) et-tabbâhü’l-hâssa ve gayruhüm mine’l-hüzzâr.