Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 145 Hüküm no: 82 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecid Mehmed Efendi’nin Haremeyn Vakfı’na ait Molla Güranî mahallesinde oturduğu evde yaptığı tadilatın keşfi İşbu hâfızü’l-kitâb bundan akdem dîvân-ı âlîde reisü’l-küttâb olan ashâbü’s-seyf ve’l-kalem zübdetü erbâbi’t-tahrîr ve’r-rakam câmi‘ü’l-mehâsini’l-aliyye müstecmi‘ü’l-mekârimi’s-seniyye zü’l-kadri’l-âli ve’l-izzi’s-sâmî el-mahfûf bi-sunûfi avâtıfi’l-meliki’s-samed Mecid Mehmed Efendi hazretleri -dâme mecduhû- meclis-i şer‘-i şerîfde takrîr-i kelâm ve ta‘bîr ani’l-merâm kılıp mahmiye-i Kostantıniyye’de Hazret-i Şeyh Vefâzâde kurbünde Molla Gürânî mahallesinde vâki‘ Haremeyn-i Şerîfeyn -şerrefehallâhu te‘âlâ- Evkāfı’ndan olup bir tarafı Müderris İdris Efendi mülkü ve bir tarafı Murad Ağa mülkü ve iki tarafı tarîk-i âm ile mahdûd olup büyût-ı müte‘addideyi müştemil olup icâre-i mu‘accele ve icâre-i müeccele ile taht-ı icârımda olan menzilin dâhiliyyesinde üç bâb fevkānî oda ve hâriciyyesinde kemer ocaklı bir matbah ve yanında üç bâb oda ve iki taşdan maslak ve bir kilâr ve bir ahır duvarını ve bi’l-cümle bu zikr olunan ebniye-i asl-ı vakfa mülhak ve harc u sarf ettiğim meblağ icâre-i mu‘acceleye mahsûb olmak üzere kendi mâlımdan ma‘rifet-i şer‘ ve izn-i mütevellî ile binâ etmişidim. El-hâletü hâzihî kıbel-i şer‘-i şerîfden üzerine varılıp ne mikdâr meblağ harc u sarf olunmuşdur tahammülü keşf ve müşâhede olunup icâre-i mu‘acceleye mahsûb olmak matlûbumdur dedikde cânib-i şer‘-i mutahhardan hâssa mi‘mârlardan üstâd Ali b. Halil ve zeyl-i kitâbda isimleri mastûrü’l-esâmî olan Müslimîn ile menzil-i mezbûrun üzerine varılıp bi’l-fi‘il vakf-ı mezbûrun mütevellîsi olan fahrü’l-akrân Hasan Bey b. Mehmed el-bevvâbü’s-sultânî mahzarında keşf ve müşâhede olundukda fi’l-hakīka müşârun-ileyh Mecid Mehmed Efendi hazretleri menzil-i mezbûrun dâhiliyyesinde müceddeden üç bâb fevkānî oda ve hâriciyyesinde kemer ocaklı bir matbah ve iki taş maslak ve üç bâb oda ve bir kilâr ve ahır duvarını tecdîd ettiği mukarrer olmağın mi‘mâr-ı merkūm zikr olunan dâhiliyyede üç bâb fevkānî odanın dolma duvarlarına <> ve sakıflarına ve döşemelerine ve demir pencerelerine ve billûr camlarına ve Arabî dolablarına ve tuğla döşemelerine ve kafesli masandıralarına ve Arabî kapılarına ve tavanlarına ve sıvalarına ve sofasına ve döşeme kayalarına ve sâir levâzım-ı mühimmesine yüz otuz bin akçe tahmîn edip ve hâriciyyesinde tecdîd olunan ebniyenin dolma duvarlarına ve pencerelerine ve kapılarına ve altında olan kilârına ve maslağı ve ahır duvarlarına ve döşemelerine ve sakıflarına ve duvar taşlarına ve sundurmasına ve saçaklarına ve kaldırım döşemesine ve sâir levâzım-ı mühimmesine yetmiş beş bin akçe tahmîn edip ebniye-i merkūme cem‘an iki yüz beş bin akçeye mütehammildir noksân ile tecdîd kābil değildir deyu mi‘mâr-ı merkūm ve sâir binâya vukūfu olan bî-garaz Müslimînler ittifâk eylediklerinde haberi vukū‘u üzere ketb ve tahrîr olundu. Tahrîren fî-evâili şehri Cemâziyelâhire li-sene isneteyn ve ışrîn ve elf. Şühûdü’l-hâl: Fahrü’l-cüyûş Hasan Çavuş b. Mustafa, Fahrü’l-emâsil ve’l-akrân Kāim Çavuş b. Abdülmennan, Fahrü’l-müderrisîn Hüseyin Efendi, Halil Çavuş, Fahr-i erbâb-ı tahrîr ve’l-kalem Mehmed Çelebi, Nasuh Bey b. Mustafa el-bevvâbü’s-sultânî, Fahrü’l-müderrisîni’l-kirâm Hoca Efendi, Kâtibü’l-hurûf Abdullah Efendi.