Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 148 Hüküm no: 84 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Hüseyin’in Seydibey mahallesindeki ev üzerinde iddia ettiği mülkiyet davasından vazgeçtiği Bi’l-fi‘il Haremeyn-i Şerîfeyn -şerrefehallâhu te‘âlâ- Evkāfı’na mütevellî olan fahrü’l-bevvâbîn Hasan Bey b. Mehmed ve mahmiye-i İstanbul mahallâtından Molla Gürânî kurbünde Seydibey mahallesinde sâkin iken bundan akdem vefât eden merhûm Ramazan Bey b. Abdi’nin zevce-i metrûkesi ve vârisesi olan Hadice bt. Abdullah tarafından husûs-ı âti’l-beyâna vekîl-i şer‘îsi olan Ali Bey b. Abdülmennan nâm cündî meclis-i şer‘-i şerîfde müteveffâ-yı mezbûrun usûbe-i nesebiyye cihetiyle vârisi olup ve menzil-i âtînin mülkiyetini iddi‘â eden oğlu Yusuf tarafından terk-i da‘vâ ve kat‘-ı husûmeti ikrâra vekîl olup nehc-i şer‘-i üzere vekâleti sâbite olan Hüseyin b. Yusuf mahzarında her biri takrîr-i kelâm edip müteveffâ-yı merkūm Ramazan Bey mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd olup dâhiliyye ve hâriciyye büyût-ı müte‘addideyi ve iki muhavvatayı ve hesâb-ı şatrancî üzere sekiz yüz doksan bir zirâ‘ arsayı müştemil olan mülk menzili hâl-i hayâtında vakf-ı sahîh-i şer‘î ile kendinden sonra cümlesinin süknâsını evvelâ kendi nefsine ba‘dehû hâriciyyesini Haremeyn-i Şerîfeyn fukarâsına ve dâhileyyesininin süknâsını dahi zevcesi mezbûr Hadice’ye ba‘dehâ ile’l-inkırâz Hadice’den olan evlâdına ba‘dehüm onu dahi Medîne-i Münevvere fukarâsına şart edip ber-mûceb-i şart-ı vâkıf nevbet-i tasarruf bize intikāl etmiş iken mezbûr Hüseyin’in müvekkili mezbûr Yusuf bi gayr-ı vech-i şer‘î mülk-i mevhûbumdur deyu ta‘arruz edip tasarrufuma mâni‘ olur kıbel-i şer‘den suâl olunup takrîr-i tahrîr olunup ta‘arruzdan men‘ ve def‘ olunmak matlûbumdur dediklerinde gıbbe’s-suâl mezbûr Hüseyin bi’l-vekâle cevâb verip müteveffâ-yı mezbûr Ramazan’ın menzil-i mezbûru târîh-i kitâbdan on yıl mukaddem oğlum müvekkilem mezbûr Yusuf’a hibe tarîki ile temlîk edip lâkin beynlerinde meclis-i hibede kabz ve kabz ve teslîm-i şer‘î bulunmadığından gayrı yine sâdıka-i ikāmete kādir olmadığı ecilden merkūm Ramazan Bey kemâ-kân menzil-i mezbûru mülkiyet [27a] üzere on yıl mikdârı zaman mutasarrıf olup ba‘dehû vech-i muharrer üzere vakf-ı sahîh-i şer‘î ile vakfedip vakfiye-i ma‘mûlün-bihâsında dahi ihrâc edip fevt oldukda müvekkilim mezbûr Yusuf menzil-i mezkûr mülk-i mevhûbumdur deyu tekrâr da‘vâ ve talebe-i şurû‘ etmiş idi. El-hâletü hâzihî husûs-ı mezbûr[a] müte‘allik da‘vâdan rücû‘ edip fâriğ olup kasr-ı yed eyledi. Ba‘de’l-yevm menzil-i mezbûrun mülkiyetine müte‘allik müvekkilemden asâleten veyâhud vekâleten da‘vâ ve taleb sudûr ederse inde’l-hükkâmi’l-kirâm makbûle ve mesmû‘a olmayıp menzil-i mezbûr ber-mûceb-i şart-ı vâkıf müstahık olanlara teslîm olunup vakfiyet üzere mutasarrıf olunsun deyu bi’l-vekâle terk-i da‘vâ ve kat‘-ı husûmete ikrâr edip ve sıhhat-i ıkrâr hükm olundukdan sonra merkūmân Hasan Bey ve Hadice Hatun’a ber-mûceb-i şart-ı vâkıf hisse-i mu‘ayyenelerini tasarrufa kıbel-i şer‘den izin birile mâ-hüve’l-vâkı‘ bi’t-taleb ketb olundu. Tahrîren fî-evâhiri şehri Cemâziyelâhir li-sene isneteyn ve ışrîn ve elf. Şühûdü’l-hâl: eş-Şeyh Muslihiddin Efendi b. Ali el-vâ‘iz, Hamza Efendi b. Tursun el-imâm, Fahrü’l-akrân Topçubaşı Ahmed Ağa b. Mahmud, Mustafa Çelebi b. Mahmud, Mehmed b. Derviş Şeyhzâde, İvaz Efendi b. eş-Şeyh Bahşî el-kādî, Mehmed b. Ali el-cündî, el-Hâc Kasım b. Abdullah er-râcil, İlyas Subaşı b. Abdullah, Hasan Çelebi [b.] Mustafa er-râcil, Ferhad b. Abdullah er-râcil, Mehmed b. Mehmed el-müezzin, Hüseyin b. Mustafa, İbrahim b. Mustafa, İbrahim b. Mustafa el-bevvâbü’s-sultânî, Ali b. Abdullah Na‘lband, Mehmed Çelebi er-râcil, Solak Mahmud Bey b. Sefer Bey, Mütevellîzâde Ahmed Çelebi b. Mehmed, el-Hâc Sinan er-râcil, Salih Halîfe b. Hızır el-müezzin, Kurt b. Abdullah Solak, Kolak Hasan Bey b. Abdullah, Davud b. Abdullah er-râcil.