Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 153 Hüküm no: 87 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Ayasofya-i kebir mahallesindeki evi Mustafa b. Abdullah’ın kiraladığı Bi’l-fi‘il Haremeyn-i Şerîfeyn -şerrefehallâhu te‘âlâ- Evkāfı mütevellîsi fahrü’l-bevvâbîn el-Hâc Hasan Bey b. Mehmed meclis-i şer‘-i şerîf ve mahfil-i dîn-i münîfde işbu hâmilü’l-kitâb Mustafa b. Abdullah nâm kimesne mahzarında ikrâr ve takrîr-i kelâm edip mahmiye-i Kostantıniyye’de Ayasofya-i kebîr mahallesinde vâki‘ bir tarafı su terâzisine ve bir tarafı Ayasofya-i kebîr Vakfı’na ve bir tarafı Ayasofya-i sagīr Vakfı’na ve bir tarafı tarîk-i âmma müntehî tûlen ve arzen bi-hesâb-ı şatrancî üç yüz yirmi dokuz zirâ‘ arsası olup bir fevkānî odayı ve bir tahta-bendi yanında bir tahta-pûşu ve bir tahtânî sofayı ve onun altında bir kilârı ve mahzeni ve yanında bir matbahı ve bi’r-i mâyı ve kenîfi ve cüneyneyi muhtevî ve tarîk-i âm tarafında üç bâb dükkânı müştemil menzili bundan akdem Başçı Memi nâm kimesne vakfedip süknâsını evvelâ nefsine ba‘dehû evlâdına ve evlâd-ı evlâdına ve ba‘de’l-inkırâz Medîne-i Münevvere fukarâsına şart eylemiş idi. Bundan akdem kendi vefât edip hâlâ evlâdı dahi münkariz olmağla vakfiye-i ma‘mûlün-bihâsı mûcebince nevbet-i tasarruf fukarâ-i Medîne-i Münevvere’ye gelmişdir öyle olsa cânib-i vakıfdan menzil-i mezbûrun îcârı lâzım olmağın tevliyetim hasebi ile ba‘de inkıtâ‘i’r-ragabât mezbûr Mustafa’ya on iki bin akçe icâre-i mu‘accele-i makbûza ve yevmî altı akçe icâre-i müeccele ile îcâr ettim ol dahi kabûl ve istîcâr ettikden sonra harcı icâre-i mu‘accelesine mahsûb olmak üzere kendi mâlından menzil-i mezbûru ta‘mîr ve termîm etmeğe izin verdim dedikde mütevellî-i mezbûru ikrâr-ı meşrûhunda mezkûr Mustafa dahi vicâhen tasdîk ve şifâhen tahkīk edicek mâ-hüve’l-vâkı‘ bi’t-taleb ketb ve imlâ ve yed-i tâlibe def‘ ve i‘tâ olundu. Tahrîren fî-evâhiri Rebî‘i’l-evvel sene isneteyn ve ışrîn ve elf. Şühûdü’l-hâl: Ali Çelebi b. Halil, Ferhad Bey b. Abdullah, Abdurrahman Çelebi b. İbrahim, Mustafa Bey b. Abdullah el-bevvâbü’s-sultânî, Hasan Bey b. Mustafa, Abdullah Efendi b. Ahmed el-müderrisîn, Ahmed b. İmran, Şa‘ban Bey b. ( ) el-cündî, Mustafa Bey el-cündî.