Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 154 Hüküm no: 88 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Soğanağa mahallesindeki hamamın Ali Bey tarafından kiralandığı Haremeyn-i Şerîfeyn -şerrefehallâhu te‘âlâ- Evkāfı’na bi’l-fi‘il mütevellî olan fahrü’l-bevvâbîn Hasan Bey b. Mehmed meclis-i şer‘-i şerîfde hâfızü’l-kitâb fahrü’l-akrân Ali Bey b. Abdülmennan nâm bevvâbü’s-sultânî mahzarında ikrâr ve takrîr-i kelâm edip evkāf-ı mezbûreden olup mahmiye-i İstanbul’da Soğanağa mahallesinde vâki‘ merhûme Âişe Hatun vakfettiği ma‘lûmü’l-hudûd ferd hamâmı târîh-i kitâbdan sene tamâmına değin yevmî on akçe hesâbı üzere cem‘an üç bin üç yüz akçeye müşârun-ileyh Ali Bey’e tevliyetim hasebi ile îcâr ettim ol dahi istîcâr ve kabûl eyledi dedikde mukırr-ı mezbûrun ikrârını merkūm Ali Bey dahi vicâhen ve şifâhen tasdîk eyledikden sonra müste’cir-i merkūm Ali Bey meclis-i şer‘de i‘âde-i kelâm edip hamâm-ı mezbûrun dolabını ve koğasını ve iplerini ve sâir levâzım-ı mühimmesini kendi mâlımdan teberru‘an etmeğe müte‘ahhid oldum dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-şehri Cemâziyelâhire sene isneteyn ve ışrîn ve elf. Şühûdü’l-hâl: Üveysî Efendi b. Abdülmennan, Malkoç Ağa b. Abdülmennan el-cündî, Mehmed Çelebi el-imâm, İbrahim Bey el-cündî.