Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 155 Hüküm no: 89 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz Ağa b. Abdülmennan’ın Medine-i Münevvere Vakfı’na ait oturduğu evde yaptığı tadilat için keşif yapıldığı Sarây-ı cedîd-i sultânî’de hâssa teberdârlar kethüdâsı olan umdetü’l-emâcid ve’l-ekârim Şahbaz Ağa b. Abdülmennan tarafından husûs-ı âti’z-zikre vekîl olup nehc-i mu‘teber üzere vekâleti sâbite olan fahrü’l-akrân Mehmed Bey b. Abdülmennan nâm cündî meclis-i şer‘-i şerîfe gelip takrîr-i kelâm ve ta‘bîr ani’l-merâm kılıp Medîne-i Münevvere evkāfından olup mahmiye-i İstanbul’da Eminbey mahallesinde vâki‘ bir tarafı yine Medîne-i Münevvere Vakfı ve bir tarafı Emin Bey Vakfı ve iki tarafı tarîk-i âm ile mahdûd olup dâhiliyye ve hâriciyye iki muhavvatayı müştemil olup dâhiliyyesinde iki bâb tahtânî odayı ve bir sofayı ve bir matbahı ve hamâmı ve su kuyusunu ve kenîfi ve fevkānî üç tabaka ki tabaka-i ûlâsı üç bâb odayı ve tabaka-i sâniyesi iki bâb odayı ve iki sofayı ve önünde dahlîzi ve tahta-pûşu ve tabaka-i sâlisesi bir köşkü müştemil olup ve hâriciyyesinde bir ahırı ve üzerinde bir bâb küçük odayı ve onun üzerinde tavanlı büyük odayı ve bir şehnişînli odayı müştemil olan menzil yirmi bin akçe icâre-i mu‘accele ve yevmî dört akçe icâre-i müeccele ile müvekkilim müşârun-ileyh Şahbaz Ağa’nın taht-ı icâresinde olup bundan akdem bazı mevâzi‘ ve bazı tecdîd, ta‘mîr ve termîme muhtâc oldukda ma‘rifet-i şer‘ ve izn-i mütevellî ve kendi mâlıyla ta‘mîr edip ettiği binâ asl-ı vakfa mülhak ve harc [ve] sarf ettiği meblağ icâre-i mu‘accelesine mahsûb olmak üzere hâlâ ta‘mîr ve termîm ve tecdîd edip on bir bin yüz seksen altı akçe harc u sarf etmişdir. Kıbel-i şer‘-i şerîfden üzerine varılıp harc u sarf ettiği meblağ ne mikdâr olduğu beyân olunup icâre-i mu‘accelesine mahsûb olmak matlûbumdur dedikde cânib-i şer‘-i mutahhardan hâssa mi‘mârlardan üstâd Ali b. Halil ve zeyl-i kitâbda mastûrü’l-esâmî olan Müslimîn ile mahalle-i mezbûra varıp bi’l-fi‘il vakf-ı mezbûrun mütevellîsi olan fahrü’l-bevvâbîn Hasan Bey b. Mahmed mahzarında keşf ve müşâhede olundukda fi’l-vâki‘ vech-i meşrûh üzere ta‘mîr ve termîm ve tecdîd eylediği mukarrer olmağın sakıflarının kiremidlerine ve odaların kapılarına ve camlarına ve virgesine ve sandal tahtasına ve iki büyük direklerine ve kireçlerine? ve hamâmın hazînesine ve sakfının kiremidlerine ve gemi tahtasından tahta-pûşuna ve kapı üzerinde olan tahtalarına ve mismâriyye ve üstâdiyye ve ırgadiyye ve sâir levâzım-ı mühimmesine cem‘an on bir bin seksen akçeye tahammülü vardır noksân ile kābil-i ta‘mîr değildir deyu mi‘mâr-ı merkūm ve sâir binâya şu‘ûru olan kimesneler alâ-tarîkı’l-ittifâk haber verdiklerinde harc u sarf eylediği meblağ-ı mezbûr icâre-i mu‘accelesine mahsûb olup menzil-i mezbûr müşârun-ileyh Şahbaz Ağa’nın otuz bir bin yüz seksen altı akçe olduğu mukarrer olmağın mâ-hüve’l-vâkı‘ bi’t-taleb ketb ve tahrîr olunup yed-i tâlibe vaz‘ olundu. Tahrîren fi’l-yevmi’t-tâsi‘ ve’l-ışrîn min-şehri Cemâziyelâhir sene isneteyn ve ışrîn ve elf. Şühûdü’l-hâl: Fahrü’l-eimme Resul Efendi b. Fazlullah, fahrü’l-akrân İlyas Bey b. Abdülmennan el-bevvâbü’s-sultânî, Hasan Çelebi b. ( ) el-bevvâbü’s-sultânî, Mehmed b. İsmail, kâtibü’l-hurûf Abdullah el-müderrisîn.