Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 157 Hüküm no: 92 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi b. el-Hac Taceddin’in evini Medine-i Münevvere Vakfı’na vakfettiği Medîne-i Münevvere -şerrefehallâhu ve nevvere- Evkāfı’na bi’l-fi‘il mütevellî olan fahrü’l-emâsil ve’l-akrân Hasan Bey b. Abdülmennan meclis-i şer‘-i şerîf-i lâzımü’t-teşrîfde vilâyet-i Anadolu’da kasaba-i Güzelhisar mahallâtından Üveyspaşa mahallesinden olup bundan akdem vefât eden merhûm Ahmed Efendi b. el-Hâc Taceddin nâm müteveffânın sulbiye kızları Fâtıma ve Hadice nâm sagīrelere kıbel-i şer‘-i kadîmden vasî nasb olunan kıdvetü’l-kuzât Şa‘ban Efendi b. el-Hâc Mustafa muvâcehesinde bi-hasebi’t-tevliyye takrîr-i da‘vâ kılıp müteveffâ-yı mezbûr Ahmed Efendi hâl-i hayâtında ve kemâl-i sıhhatinde mahalle-i mezbûrede vâki‘ hudûdunun bir tarafı Hüseyin Bey b. ( ) mülkü ile Memişâh b. ( ) mülküne ve bir tarafı Âbide Hatun b. Abdi Çelebi mülküne ve bir tarafı el-Hâc Yusuf b. ( ) mülküne ve iki tarafı tarîk-i âmma müntehî olup dâhiliyyesi ve hâriciyye muhavvateyni müştemil olup dâhiliyyesi iki bâb beyt-i ulvî ve iki bâb beyt-i süflî ve sofayı ve kenîfi ve cüneyneyi zât-ı eşcârı müştemil hâriciyyesi dört bâb beyt-i ulvî ve bir hücreyi ve şehnişîni ve sofayı ve bir bâb beyt-i süflî ve ayn-ı cârî ve kilârı ve ıstablı ve kenîfi ve turunc bahçesini müştemil menzilini alâ-tarîkı’l-îsâl [îsâ] vakf [ve] habs edip menzil-i mezbûr ecr-i misli ile îcâr olundukdan sonra ücreti Medîne-i Münevvere fukarâsına şart [ve] ta‘yîn etmişdir. Menzil-i mezbûru tevliyetim hasebiyle taleb ederim suâl olunsun dedikde gıbbe’s-suâl ve akībe’l-inkâr ve’l-istişhâd udûl-i Müslimînden Şeyh Mehmed b. Hacı Efendi ve Mevlânâ Mahmud b. Mehmed ve Mustafa b. el-Hâc Muharrem ve Mustafa b. İlyas nâm kimesneler li-ecli’ş-şehâde hâzırûn olup fi’l-vâki‘ müteveffâ-yı mezbûr Ahmed Efendi hâl-i hayâtında ve kemâl-i sıhhatinde menzil-i mahdûd-ı mezbûru bi tarîkı’l-îsâ vakf [ve] habs edip ecr-i misli ile îcâr olundukdan sonra ücretini Medîne-i Münevvere fukarâsına ta‘yîn ve şart eyledi menzil-i mezbûrun vech-i muharrer üzere vakıf olunduğuna şâhidleriz şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîli’ş-şer‘î ve’t-tezkiyye şehâdetleri hayyiz-i kabûle vâki‘ olmağın mûcebi ile hükmolunup mâ-vaka‘a bi’t-taleb ketb olundu. Tahrîren fî-evâili Cemâziyelâhire sene isneteyn ve ışrîn ve elf. Şühûdü’l-hâl: Fahrü’l-akrân Şeyh Mehmed Çelebi b. Abdurrahman Efendi, fahrü’l-cüyûş Mehmed Çavuş [b.] Ali Çavuş, umdetü’l-ahâlî Veli, el-Hâc Mustafa b. Ömer, Ca‘fer Ağa b. Abdullah, el-Hâc Musa [b.] Veli.