Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 158 Hüküm no: 93 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’nın Güzelhisar kasabasındaki evinin Âbide Hatun bt. Abdi tarafından kiralandığı Medîne-i Münevvere Evkāfı’na bi’l-fi‘il mütevellî olan fahrü’l-bevvâbîn Hasan Bey b. Mehmed meclis-i şer‘-i şerîfde hâfızü’l-kitâb vilâyet-i Anadolu’da kasaba-i Güzelhisar mahallâtından Üveyspaşa mahallesi sâkinlerinden Âbide Hatun bt. Abdi mahzarında ikrâr ve takrîr-i kelâm edip mahalle-i mezbûrede vâki‘ bir tarafı Hüseyin ve Memişâh mülkleri ve bir tarafı mezbûre Âbide Hatun mülkü ve bir tarafı el-Hâc Yusuf mülkü ve iki tarafı tarîk-i âm ile mahdûd olup merhûm Ahmed Efendi’nin Medîne-i Münevvere fukarâsına vakıf eylediği menzil-i mezbûr cemî‘-i tevâbi‘ ve levâhıkı ile târîh-i kitâbdan yevmî beş akçe ücret-i müeccele ile mezbûr[e] Âbide Hatun’a tevliyetim hasebiyle îcâr ettim ol dahi istîcâr eyleyip ba‘de’l-yevm menzil-i mezbûr mezbûrenin taht-ı îcâriyesindedir dedikde mütevellî-i mezbûr ikrârını mezbûre Âbide Hatun dahi vicâhen tasdîk eyledikden sonra mütevellî-i mezbûr i‘âde-i kelâm edip menzil-i mezbûrun ücretinden yevmî dört akçesin cânib-i vakfa edâ edip ve yevmî bir akçesin menzil-i mezbûrun ta‘mîr ve termîmine harc u sarf eylemeğe mezbûre Âbide Hatun’a izin verdim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fî-gurreti Recebi’l-mürecceb sene isneteyn ve ışrîn ve elf. Şühûdü’l-hâl: es-Sâbıkūn.