Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 158 Hüküm no: 94 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kubad Çavuş b. Abdullah’ın Haremeyn Vakfı’na ait evde tadilat yapmasına izin verildiği Umdetü’l-emâcid ve’l-ekârim Nuh Ağa b. Abdüddâim tarafından husûs-ı âti’l-beyâna vekîl olup bimâ-hüve tarîki’s-sübût şer‘an vekâleti sâbite olan fahrü’l-cüyûş Kubad Çavuş b. Abdullah meclis-i şer‘a gelip takrîr-i kelâm edip mahmiye-i İstanbul mahallâtından Helvacıbaşı mahallesinde vâki‘ bir tarafı merhûm Kasımpaşa Vakfı ve bir tarafı Mustafa Çavuş ile Davud Çavuş mülkü ve iki tarafı tarîk-i âm ile mahdûd olan Haremeyn-i Şerîfeyn Vakfı’ndan olup icâre-i mu‘accele ve icâre-i müeccele ile müvekkilim müşârun-ileyh Nuh Ağa’nın taht-ı icâresinde olan menzil-i mezbûrun hâriciyyesinde vâki‘ olan ahırın ve üzerinde olan iki bâb oda ve ahır duvarı ve tarîk-i âm tarafında olan duvar harâba müşrif olup vakf-ı mezbûr mâlından kat‘â müsâ‘ade olmayıp müvekkilem müşârun-ileyh kendi mâlından tecdîd edip eylediği binâ asl-ı vakfa mülhak olup harc u sarf olunan meblağ icâre-i mu‘accelesine mahsûb olmak üzere binâ etmek murâdıdır kıbel-i şer‘den üzerine varılıp vâki‘ hâl keşf olunmak murâdıdır dedikde cânib-i şer‘-i şerîfden hâssa mi‘mârlardan üstâd Ali b. Halil ve zeyl-i kitâbda mastûrü’l-esâmî olan Müslimîn ile mahall-i mezbûra varıp mütevellîsi fahrü’l-bevvâbîn Hasan Bey b. Mehmed mahzarında keşf ve müşâhede olundukda fi’l-vâki‘ zikr olunan mahaller harâba müşrif olduğu muhakkak ve mukarrer olmağla mütevellî-i mezbûr vech-i meşrûh üzere binâya izin verdikde mâ-hüve’l-vâkı‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-şehri Cemâziyelâhire li-sene isnâ ve ışrîn ve elf. Şühûdü’l-hâl: Fahrü’l-müderrisîni’l-kirâm Receb Efendi, Kurt Bey b. Mehmed el-cündî, Ali b. Abdullah, Mehmed Bey b. Abdullah, Piyale Bey b. Abdullah, Ali Çelebi, Kara Mehmed, Rıdvan Bey b. Abdullah ve gayruhüm.