Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 162 Hüküm no: 97 Orijinal metin no: [32b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülhanî Hatun bt. Çelebi vakfiyesi Elhamdü li-veliyyihî ve’s-salâtü ve’s-selâmü alâ-nebiyyihî ve alâ-âlihî ve sahbih. Ammâ ba‘d, işbu mazmûnunda vakıf ikrârından bahseden sahîh ve şer‘î bir hüccettir. Mahrûse-i Üsküdar mahallâtından Hasan Ağa mahallesinde sâkine sâhibetü’l-hayrât ve’l-hasenât râgıbetü’l-meberrât Gülhanî Hatun bt. Çelebi dünyânın fânî, âhiretin bâkī olduğunu idrâk ettiğinde meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup işbu ikrârın kendisinden sudûruna kadar mâliki olduğu ve tah-ı tasarrufunda bulundurduğu, mahalle-i mezbûrede kâin, tahtânî bir bâb hâneyi, sofayı ve su kuyusunu müştemil, hudûdu iki tarafından Marziye Hatun bt. Musa mülkü, iki tarafından da tarîk-ı âm ile mahdûd bulunan menzilini cümle tevâbi‘i ve levâhıkıyla, merâfık ve tarâıkıyla habs, tasadduk ve vakfettiğini ikrâr ve i‘tirâf eyledi. Süknâyı evvela müddet-i hayâtınca Muharrem b. Yunus nâm kimseye, sonra Ferhunde Hatun bt. Abdullah nâm zevcesine, sonra evlâdihimâ, evlâd-ı evlâdihimâya ile’l-inkırâz şart eyledi. Ba‘de’l-inkırâz menzil-i mezbûrun mütevellî yediyle icâreye verilip ücret-i kirânın Medîne-i münevvere fukarâsına irsâlini şart eyledi. Tevliye-i hasbiyyeyi Kasım b. Abdullah nâm kimseye şart etti… Hâl bu minvâl üzere iken vâkıfe-i mezbûre vakf-ı akār İmâm-ı A‘zam Hazret-i Ebû Hanîfe-i Kûfî hazretleri yanında lâzım değildir diyerek vakfiyyetten rücû‘ edip menzil-i mezkûrun silk-i mülküne idhâlini talep ve mütevellî-yi mezkûrdan istirdâd eyledi. Mütevellî mezbûr Kasım redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr, bey‘i, hibesi ve îrâsı câiz olmayacak şekilde, müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ semi‘ahû el-âyetü. Cerâ zâlike ve hurrire fî-evâsıtı Cemâziyelâhire li-sene ihdâ ve ışrîn ve elf. Şühûdü’l-hâl: Mevlânâ Mehmed b. Cemâleddin, Ali b. Turgut, el-Hâc Abdullah, Kurd b. Haydar, Mehmed b. Memi, Mehmed b. Ali, Ahmed b. Abdullah