Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 163 Hüküm no: 98 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Temenna Hatun bt. Abdullah’ın evinin vakfiyetinin şahitlerle sabit olduğu İşbu hâfızü’l-kitâb fahrü’l-akrân Hüseyin Bey b. Abdullah nâm bevvâbü’s-sultânî ve bi’l-fi‘il Haremeyn-i Şerîfeyn Evkāfı’na mütevellî olan fahrü’l-bevvâbîn Hasan Bey b. Mehmed ile ma‘an meclis-i şer‘-i şerîfe gelip takrîr-i kelâm ve ta‘bîr ani’l-merâm kılıp mahmiye-i İstanbul’da Sarı Nasuh mahallesinde sâkine iken bundan akdem vefât eden merhûme Temenna Hatun bt. Abdullah mahalle-i mezbûrede vâki‘ bir tarafı merhûm Mehmed Paşa Vakfı ve bir tarafı Belkıs Hatun bt. ( ) mülkü ve bir tarafı Hürsev b. Abdullah mülkü ve bir tarafı tarîk-i âm ile mahdûd olan mülk menzilini bin on bir Rebî‘ülevveli’nin evâilinde vakfedip süknâsını evvelâ kendi nefsine ba‘dehâ günde üç İhlâs-ı şerîf tilâvet etmek üzere bana ve ile’l-inkırâz evlâdına ba‘dehû Medîne-i Münevvere fukarâsına vakf ve şart edip menzil-i mezbûrda nevbet-i süknâ ve tasarruf benim hakk-ı meşrûtum olduğu yedimde olan vakfiye-i ma‘mûlün-bihâsında mastûr ve mukayyed olup menzil-i merkūm bana intikāl etmiş iken mahalle-i mezbûre sükkânından vâkıfe-i mezbûrenin zevci olup hâssa suyolcular zümresinden olan Mehmed Bey b. Abdülmennan nâm kimesne mücerred menzil-i mezbûr içinde bulunmağla çıkmayıp zevcem mezbûre Temenna Hatun vakfetmezden mukaddem menzil-i mezbûru bana yirmi bin akçe semen-i mu‘ayyen makbûz ile bey‘ eyledi deyu mülkiyet iddi‘âsın edip bundan akdem da‘vâsına muvâfık beyyine taleb olundukda birkaç def‘a kıbel-i şer‘den mehil-i şer‘î verilip ıtyân-ı beyyineden izhâr-ı acz eyledikden sonra menzil-i mezbûrdan kasr-ı yed edip bana teslîm etmeğe tenbîh olunmuş iken hâlâ dahi mülkiyet iddi‘âsında musırr olup hakk-ı meşrûtumu bana teslîmden imtinâ‘ eder kıbel-i [şer‘-i] şerîfden mahall-i mezbûra varılıp menzil-i mezbûrun vakfiyetini bilir Müslimânlardan suâl olunup takrîrleri bi’l-müvâcehe tahrîr olunmasın matlûbumdur dediklerinde [33a] cânib-i şer‘-i mutahhardan mahall-i mezbûra varılıp ahâlî-i mahalle sükkânından Hüsameddin b. Ali el-müezzin ve Ahmed b. Abdullah er-râcil ve Ali b. Halil nâm Müslimânlardan hakīkat-ı hâl istintâk olundukda her biri meclis-i şer‘de bast-ı merâm edip fi’l-vâki‘ menzil-i mezbûru mezbûr Temenna Hatun târîh-i mezbûrda vech-i meşrûh üzere vakf ve şart eylediği ma‘lûm ve mesmû‘umuz olup vakfiye-i ma‘mûlün-bihâsı dahi manzûrumuz olmuşdur vakıf biliriz deyu alâ-tarîki’ş-şehâde haber verdiklerinde mâ-hüve’l-vâkı‘ alâ-vukū‘ihî gıbbe’t-taleb ketb olunup yed-i tâlibe vaz‘ ve teslîm olundu. Tahrîren fî-evâhiri Cemâziyelâhir li-sene isneteyn ve ışrîn ve elf. Şühûdü’l-hâl: Ali b. Halil, Ahmed b. Mehmed, Hasan b. Abdullah, el-Hâc Ali, Hasan b. Mehmed.