Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 166 Hüküm no: 101 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Para Vakfı’nın yeni mütevellisinin önceki mütevelli dönemine ait alacaklarını tahsil ettiği El-yevmi’s-sâmin ve’l-ışrîn min-şehri Ramazâni’l-mübârek li-sene isneteyn ve ışrîn ve elf. Mahmiye-i İstanbul’da Haremeyn-i Şerîfeynin Nükūd Vakfı’na mütevellî olan fahrü’l-akrân Mustafa Bey b. Kurt nâm bevvâbü’s-sultânî meclis-i şer‘-i şerîfde hâfızü’l-kitâb sâbıkā evkāf-ı mezbûr mütevellîsi olup bundan akdem vefât eden merhûm Mustafa Bey b. Mehmed’in sulbî oğlu Hasan Beşe nâm râcil mahzarında ikrâr ve takrîr-i kelâm edip merkūm Hasan Beşe müteveffâ-yı mezkûrun terekesine vâzı‘ü’l-yed olmağla vakf-ı merkūm mâlına dahi vâzı‘ü’l-yed etmiş idi. El-hâletü hâzihî vakf-ı mezbûr mâlından zimem-i nâsda olup Hüseyin Çavuş b. Haydar zimmetinde olan kırk sekiz bin akçeyi mahrûse-i Üsküdar’da merhûme Vâlide Sultân evkāfının sâbıkā mütevellî[si] olan Kasım Bey vakf için istikrâz eylediği yüz on yedi bin yedi yüz altmış akçeyi ve Elmascıbaşı demekle ma‘rûf kimesne zimmetinde olan yetmiş bin akçeyi ve Ahmed Paşazâde demekle meşhûr Murad Bey zimmetinde olan doksan bin akçeyi ve Hümâ Hatun zimmetinde olan iki bin sekiz yüz seksen akçeyi merhûm Süleyman Ağa ile Ali Ağa’nın huzûrunda eczâ’-i şerîf tilâvet olunmak için vakfeyledikleri altmış altı bin akçeden Salamon nâm Yahudi’nin zimmetinde olan altmış bin akçeyi ve a‘lemü’l-ulemâ’i’l-izâm sâbıkā evkāf müfettişi olan Ali Efendi zimmetinde olan altı bin akçeyi cem‘an zimem-i nâsda olan üç yüz doksan dört bin altı yüz kırk akçeyi merkūm Hasan Beşe bana medyûn olanlardan gösterip teslîm eyledi ben dahi medyûn olan mezbûrûndan kabûl edip hâsıl olan ribhlerini yedlerinden ahz eyledim dedikde mukırr-ı mezbûrun ıkrâr-ı meşrûhunu merkūm Hasan Beşe dahi vicâhen ve şifâhen tasdîk ettikde mâ-hüve’l-vâkı‘ gıbbe’t-taleb ketb olunup yed-i tâlibe def‘ ve teslîm olundu. Tahrîren fi’l-yevmi’l-hâmis aşer min-şehri Ramazâni’l-mübârek li-sene isneteyn ve ışrîn ve elf. Şühûdü’l-hâl: Halil Bey b. Abdülmennan el-bevvâbü’s-sultânî, Mehmed Bey b. Üveys el-bevvâb, Hüseyin b. Hızır el-bevvâb, Halil b. Pîrî el-bevvâb, Hacı Ali el-bevvâb, Mustafa Bey b. ( ) el-bevvâb, Davud Bey b. ( ) el-bevvâb, Süleyman b. Hüsrev el-bevvâb ve gayruhüm.