Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 167 Hüküm no: 102 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa Vakfı’nın yeni mütevellisinin alacaklarını tahsil ettiği Mahmiye-i İstanbul’da Sarây-ı atîk-i sultânî kurbünde vâki‘ mu‘allimhânenin vâkıfı olan merhûm Süleyman Ağa Vakfı’na bi’l-fi‘il mütevellî olan fahrü’l-akrân Mustafa Bey b. Kurt nâm bevvâbü’s-sultânî meclis-i şer‘-i şerîfe hâfızü’l-kitâb sâbıkā vakf-ı mezbûr mütevellîsi olup bundan akdem vefât eden merhûm Mustafa Bey b. Mehmed’in sulbî oğlu Hasan Beşe nâm râcil muvâcehesinde ikrâr ve takrîr-i kelâm edip [mez]bûr Hasan Beşe babası müteveffâ-yı mezbûrun terekesine vâzı‘ü’l-yed olmağla vakf-ı mezbûr mâlına dahi vâzı‘ü’l-yed etmiş idi. El-hâletü hâzihî vakf-ı mezbûr mâlından Perpiye bt. Babatoma nâm zimmiye zimmetinde olan on üç bin akçeyi ve Aleksandra bt. Yani nâm zimmiye zimmetinde olan on bin akçeyi ve İbrahim Çelebi nâm kimesnenin vâlidesi zimmetinde istiğlâl hücceti mûcebince altmış beş bin akçeyi ve sâir zimem-i nâsda olan kırk iki bin akçeyi vakf-ı mezbûrun zevâyidinden hâsıl olan nakd üç bin akçeyi cem‘an yüz otuz üç bin akçeyi merkūm Hasan Beşe bana yerli yerinden gösterip ben dahi kabûl edip medyûn olanlardan ribhlerini ahz ü kabz eyledim dedikde mukırr-ı mezbûrun vech-i meşrûh üzere cârî olan ikrârını merkūm Hasan Beşe dahi vicâhen ve şifâhen tasdîk eyledikde mâ-hüve’l-vâkı‘ gıbbe’t-taleb ketb olunup yed-i tâlibe def‘ ve teslîm olundu. Tahrîren fi’l-yevmi’l-hâmis ve’l-ışrîn min-şehri Ramazâni’l-mübârek sene isneteyn ve ışrîn ve elf. Şühûdü’l-hâl: Halil Bey b. Abdülmennan el-bevvâbü’s-sultânî, Mehmed Bey b. Üveys el-bevvâbü’s-sultânî, Hüseyin b. Hızır el-bevvâb, Halil b. Pîrî el-bevvâb, Hacı Ali el-bevvâbü’s-sultânî, Mustafa Bey b. Abdullah el-bevvâb, Süleyman b. Hüsrev el-bevvâb, Ahmed b. İmran.