Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 168 Hüküm no: 103 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Şahkulu’nun Haremeyn Evkafı’na vakfettiği evi sahiplenen Zemâne bt. Abdullah ve Canfeda bt. Abdullah’ın müdahalesinin engellenmesi İşbu hâfızü’l-kitâb mahmiye-i Kostantıniyye’de bi’l-fi‘il Haremeyn-i Şerîfeyn -şerrefehallâhu te‘âlâ- Evkāfı’na mütevellî olan fahrü’l-emâsil ve’l-akrân Hasan Bey b. Mehmed nâm bevvâbü’s-sultânî meclis-i şer‘-i şerîfde menzil-i âti’z-zikre kendilere meşrût olmak zum‘u ile vâzı‘atü’l-yed olan Zemâne bt. Abdullah ve Canfeda bt. Abdullah nâm hatunlar taraflarından husûs-ı âti’l-beyâna vekîl olup Mustafa Çelebi b. İbrahim ve İbrahim b. Sinan şehâdetleri ile şer‘an vekâleti sâbite olan fahrü’l-akrân Mahmud Bey b. Abdülmennan nâm cündî muvâcehesinde üzerine takrîr-i da‘vâ edip mahmiye-i mezbûre mahallâtından Kasab İvaz mahallesinde vâki‘ bir tarafı Behram b. Abdullah mülkü ( ) ve bir tarafı merhûm Mehmed Subaşı Vakfı ve iki tarafı tarîk-i âm ile mahdûd olan menzili bundan akdem merhûm el-Hâc Veli b. Şahkulu hâl-i hayâtında silk-i mülkünde iken süknâsını evvelâ kendi nefsine ba‘dehû zevcesi Zeynî Hatun’a ve evlâd-ı evlâdına ba‘dehâ kendinin atîkalarına ba‘de’l-inkırâz Medîne-i Münevvere fukarâsına vakf ve habs edip minvâl üzere şart etmiş iken hilâf-ı şart-ı vâkıf mezbûretân Zemâne ve Canfeda vâkıf-ı mezbûrun zevcesi mezbûre Zeynî Hatun’un atîkaları olmak ile bi gayr-ı vech-i şer‘î menzil-i mezbûra vâzı‘atü’l-yed olmuşlardır hâlâ menzil-i mezbûr Medîne-i Münevvere fukarâsına intikāl etmişdir. Tevliyetim hasebiyle menzil-i mezbûrun bana teslîm olunmasın taleb ederim suâl olunsun dedikde gıbbe’s-suâl vekîl-i merkūm Mahmud Bey cevâbında fi’l-vâki‘ menzil-i mezbûru vâkıf-ı merkūm el-Hâc Veli vakıf ve habs edip şurût-ı mezkûr üzere şart eylediği mukarrerdir. Lâkin müvekkilelerim mezbûretân Zemâne ve Canfeda vâkıf-ı mezbûrun zevcesi mezbûre Zeynî Hatun’un atîkalarıdır menzil-i mezbûrda kat‘â alâkaları yokdur zevcesinin atîkaları olmak ile vâzı‘atü’l-yed olmuşlardır demeğin vekîl-i mezbûr Mahmud Bey’e menzil-i mezbûru şart-ı vâkıf mûcebince mütevellî-i mûmâ-ileyh Hasan Bey’e teslîm edip kasr-ı yed etmeğe tenbîh birle mâ-hüve’l-vâkı‘ bi’t-taleb ketb olunup yed-i tâlibe def‘ ve teslîm olundu. Tahrîren fi’l-yevmi’l-ışrîn min-şehri Ramazâni’l-mübârek li-sene isneteyn ve ışrîn ve elf. Şühûdü’l-hâl: Fahrü’l-kuzâti’l-İslâm Ali Efendi b. Mehmed, Mehmed Çelebi b. Ali Efendi el-müsta‘id, fahrü’l-akrân Sinan Bey b. Abdülmennan el-bevvâb, Cebeciler Bölüğübaşısı Mahmud Bey, Pîrî Bey b. Rüstem, el-Hâc Süleyman b. Abdülmennan, İbrahim Bey b. Mustafa, Mehmed b. Mustafa, Mehmed [b.] Abdi, Süleyman b. Hasan.