Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 169 Hüküm no: 104 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Kasap İvaz mahallesindeki evin Mahmud Bey b. Abdülmennan’a kiraya verildiği Mahmiye-i İstanbul’da Haremeyn-i Şerîfeyn -şerrefehallâhu te‘âlâ- Evkāfı’na bi’l-fi‘il mütevellî olan fahrü’l-akrân Hasan Bey b. Mehmed nâm bevvâbü’s-sultânî meclis-i şer‘-i şerîfde hâfızü’l-kitâb fahrü’l-eşbâh Mahmud Bey b. Abdülmennan nâm cündî muvâcehesinde ikrâr ve takrîr-i kelâm edip evkāf-ı mezbûrdan olup mahmiye-i mezbûre mahallâtından Kasab İvaz mahallesinde vâki‘ bir tarafı Behram Bey b. Abdullah mülkü ve bir tarafı merhûm Mehmed Subaşı Vakfı ve iki tarafı tarîk-i âm ile mahdûd olup iki muhavvata[yı] müştemil olup muhavvata-i dâhiliyyesi dört bâb beyt-i süflîyi ve bi’r-i mâyı ve kenîfi müştemil olup muhavvata-i hâriciyyesi bir oda bir kenîfi olan menzili dört bin akçe icâre-i mu‘accele ve yevmî iki akçe icâre-i müeccele ile merkūm Mahmud Bey’e târîh-i kitâbdan tevliyetim hasebiyle îcâr eyledim ol dahi vech-i meşrûh üzere istîcâr ve kabûl eyledi icâre-i mu‘accele olan dört bin akçeyi vakıf için merkūm Mahmud Bey yedinden bi’t-tamâm ve’l-kemâl alıp kabz ve teslîm[tesellüm] eyledim ba‘de’l-yevm menzil-i mezbûr merkūm Mahmud Bey’in taht-ı icâresindedir dedikde mukırr-ı mezbûrun ikrâr-ı meşrûhunu merkūm Mahmud Bey dahi vicâhen ve şifâhen tasdîk eyledikden sonra mütevellî-i merkūm Hasan Bey meclis-i mezbûrda i‘âde-i kelâm edip zikr olunan menzili müste’cir-i merkūm murâd ettiği üzere tecdîd ve ta‘mîr edip ihdâs ettiği ebniye vakf-ı mezbûra mülhak olup ve harc u sarf eylediği meblağ icâre-i mu‘accelesine mahsûb olmak üzere binâ etmeğe dahi izin verdim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olunup yed-i tâlibe def‘ ve teslîm ve terkīm olundu. Tahrîren fi’l-yevmi’s-sâbi‘ ve’l-ışrîn min-şehri Ramazâni’l-mübârek li-sene isneteyn ve ışrîn ve elf. Şühûdü’l-hâl: Fahrü’l-kuzâti’l-İslâm Ali Efendi b. Mehmed, Mehmed Efendi b. Ali el-müsta‘id, Sinan Bey b. Abdülmennan el-bevvâb, İbrahim Bey b. Mehmed er-râcil, Pîrî Bey b. Rüstem, Mahmud Bey b. Mustafa, el-Hâc Süleyman b. Abdullah, Mehmed b. Abdi, Murad Beşe b. Haydar, İbrahim Bey b. Mustafa, Mehmed b. Mustafa, Hasan b. Süleyman ve gayruhüm.