Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 170 Hüküm no: 105 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’na ait evin müzâyede sonucu Zülfikar b. Abdülvahhab’a kiralanması Dârü’s-saltanati’s-seniyye Kostantıniyye el-mahmiyede Medîne-i Münevvere-i fâhire -şerrefehallâhu te‘âlâ fi’d-dünyâ ve’l-âhire- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu sâhibü’l-kitâb Zülfikār b. Abdülvahhab nâm kimesne muvâcehesinde ikrâr u i‘tirâf edip evkāf-ı mezbûreden olup mahrûse-i Üsküdar’da Mehemedpaşa mahallesinde vâki‘ bir tarafı Âişe Hatun bt. ( ) mülkü ve bir tarafı İbrahim Beşe b. Abdullah mülkü ve bir tarafı el-Hâc Mustafa ed-Debbâğ mülkü ve bir tarafı tarîk-i âm ile mahdûd olup iki bâb fevkānî odaları ve ahırı müştemil olan vakıf menzili ba‘de’l-müzâyede merkūm Zülfikār’a iki bin akçe icâre-i mu‘accele ve beher şehr on beş akçe icâre-i müeccele ile îcâr eyledim ol dahi menzil-i mezbûru vech-i muharrer üzere istîcâr ve kabûl eyledikden sonra meblağ-ı mezbûr iki bin akçeyi merkūm Zülfikā[r] yedinden tamâmen alıp kabz eyledim dedikde mütevellî-i mesfûr vech-i meşrûh üzere sudûr eden ikrârını merkūm Zülfikār bi’l-müvâcehe tasdîk etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı Rebî‘i’l-evvel li-sene seb‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Mefharü’l-kuzât İbrahim Efendi b. Hasan el-kassâmü’l-askerî, Abdülmümin Efendi b. Abdüssaîd el-mülâzım, Ali Beşe b. Ahmed, İbrahim Çelebi b. Ahmed er-râcil, Mehmed Çelebi b. Mahmud el-müderris, Üstâd Mehmed Bey b. Sinan, Üstâd Osman Bey b. Abdullah, Mehmed Beşe b. Abdullah er-râcil, Ali Bey b. Abdullah el-bevvâb, Mustafa Çelebi b. ( ) Kâtib-i vakf-ı mezbûr, Ali Çelebi b. Hızır el-câbî, İbrahim b. Mustafa el-bevvâbü’s-sultânî ve gayruhüm mine’l-hâzırîn.