Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 171 Hüküm no: 107 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’a ait olup İsmail Ağa b. Abdülmennan’ın oturduğu evde yaptığı tadilatın keşfi Haremeyn-i Muhteremeyn Evkāfı’ndan olup mahrûse-i İstanbul’da Ayasofya-i kebîr mahallesinde vâki‘ bir tarafı Mehmed Bey mülkü ve bir tarafı İsmihan Hatun Vakfı ve bir tarafı müste’cirân âti’z-zikr mülkü ve bir tarafı tarîk-i âm ile mahdûd olan menzile sekiz bin akçe icâre-i mu‘accele ve yevmî üç akçe icâre-i müeccele ile mutasarrıf olan Çerkes Dilsiz demekle ma‘rûf olan fahrü’l-a‘yân İsmail Ağa b. Abdülmennan tarafından husûs-ı âti’l-beyânda vekîl olup hasm-ı câhid mahzarında müvekkil-i mezbûrun makām-ı tekellüme kāim îmâ ve işâretini ârif olan Hasan Çavuş b. Abdülmennan ve Abdülkadir Bey b. Abdülkerim şehâdetleri ile vekâleti sâbite olan umdetü’l-akrân Abdülkerim Ağa b. Abdülmennan nâm zevvâk-ı sultânî meclis-i şer‘-i şerîfe gelip takrîr-i kelâm eyleyip bundan esbak menzil-i mezbûr harâba müşrif olup tecdîde muhtâc oldukda vakfın müsâ‘adesi olmamağın müvekkilem-i mezbûr İsmail Ağa kendi mâlından tecdîd ve imâret edip ba‘dehû cümle ettiği binâ vakfın olup harc u sarf olunan akçesi cânib-i vakıfda icâre-i mu‘accelesi olmak üzere izn-i şer‘î ve ma‘rifet-i mütevellî ile dâhiliyye ve hâriciyyesinde müceddeden dört fevkānî oda ve bir sofa ve bir tahta-pûş ve bir matbah ve bir kilâr ve iki kenîf ve bir ahır ihdâs etmişidi hâlâ kıbel-i şer‘-i şerîfden üzerine varılıp ne mikdâr akçeye tahammülü vardır keşf olunmasın taleb ederim dedikde hâssa mi‘mârlardan üstâd Ali Çelebi b. Halil ve zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp bi’l-fi‘il mütevellîsi olan fahrü’l-akrân Hasan Bey b. Mehmed nâm bevvâbü’s-sultânî mahzarında keşf olundukda fi’l-vâki‘ vech-i meşrûh üzere dört bâb fevkānî oda ve bir sofa ve bir tahta-pûş ve bir matbah ve bir kilâr ve iki kenîf ve bir ahır müceddeden binâ olunup mesâha olundukda hesâb-ı şatrancî üzere altı yüz yetmiş zirâ‘ taş duvarı ve beş yüz zirâ‘ dolma duvarı ve iki yüz otuz beş zirâ‘ döşemesi ve beş yüz yirmi zirâ‘ sakfı olup bu cümleye harc olunan taş ve kireç ve kiremidin ve tahtanın ve merteklerin ve zikr olunan odaların demir pencerelerinin ve camlarının ve sâir kerestesinin ve üstâdiyye ve neccâriyye ve hammâliyye ve ırgadiyyesinin cem‘an yüz altmış üç bin akçeye tahammülü vardır deyu mi‘mâr-ı merkūm ve sâir ehl-i vukūf Müslimîn ittifâk ettiklerinde menzil-i mezbûrun mukaddemâ nıkzına kıymet-i takvîm olunan on sekiz bin akçe meblağ-ı mezbûrdan ifrâz olundukdan sonra mâ‘adâsı olan yüz kırk beş bin akçeyi mütevellî-i müşârun-ileyh mesfûr İsmail Ağa’nın cânib-i vakıfda mukaddemâ olan sekiz bin akçe icâre-i mu‘accelesine mahsûb ve munzam edip ve âhiren müeccele mezbûrenin yevmî bir akçesini menzil-i mezbûrun meremmâtına sarf olunmağa ta‘yîn etmeğin kıbel-i şer‘den dahi izin verilip mâ-vaka‘a ketb olundu. Fî evâhiri Saferi’l-hayr li-sene selâse ve ışrîn ve elf. Şühûdü’l-hâl: Süleyman Bey el-cündî, Mustafa Bey el-bevvâbü’s-sultânî, Ahmed Halîfe el-müezzin bi-câmi‘-i Ayasofya-i kebîr, Hüseyin Bey b. Abdullah el-cündî, Hasan Bey b. Abdullah, Ferhad Bey b. ( ) el-bevvâbü’s-sultânî, İbrahim Bey b. ( ) el-bevvâbü’s-sultânî ve gayruhüm.