Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 285 Hüküm no: 242 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aliye bt. Selim’in alacak davasında anlaşma sağlandığı Ma‘rûz, Sâhibe-i arzuhâl mu‘arrefetü’z-zât Aliye bt. Selim nâm hatun Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede meclis-i şer‘-i hatîrde bakkāl tâifesinden derûn-ı arzuhâlde mastûrü’l-ism Yani v. Nikola nâm zimmî tarafından husûs-ı âti’l-beyânda tasdîka vekîl-i şer‘îsi Nikoli ve Yanaki ve Zahari, Yani nâm zimmî tarafından kezâlik husûs-ı âti’l-beyânda vekîl-i şer‘îsi diğer Zahari v. Yorgi nâm zimmîler muvâcehelerinde mahrûse-i Galata’ya muzâfe kasaba-i Kasımpaşa’da Sipâhî fırını ittisâlinde Ahmed Efendi dükkânı demekle arîf bir bâb bakkâl dükkânı ashâb-ı hayrâtdan el-Hâc Ömer Efendi vakfı müsakkafātından gedik ta‘bîr olunur vakıf âlât-ı lâzıme-i ma‘lûmenin yüz yirmi sehm i‘tibârıyla yetmiş beş sehmi müvekkilân-ı mersûmândan mesfûr Yani zimmînin ve mâ‘adâ kırk beş sehmi mersûm Zahari zimmînin iştirâken taht-ı tasarruflarında ve ol vechile dükkân-ı mezkûrda müvekkilân-ı mersûmân şehriye altı guruş kirâ tesmiyesiyle müstecirleri olmağla müddet-i ma‘lûmede kirâ-i mezkûreden müvekkilân-ı mersûmân zimmetlerinde mecmû‘ sekiz yüz elli sekiz guruş alacak hakkım olmağla meblağ-ı mezkûru müvekkilân-ı mersûmândan hâlâ taleb ederim deyü tasaddî eylediğim da‘vâmdan bâ-tavassut-ı muslihîn müvekkilân-ı mersûmân ile bi’t-tav‘ ve’r-rızâ üç yüz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan müvekkilân-ı mersûmân Yani ve Zahari zimmîlerin zimmetlerini kabûllerini hâvî ibrâ ve iskāt eyledim deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 15 Ca sene [12]57.