Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 175 Hüküm no: 110 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait İshakpaşa mahallesindeki evin müzâyede sonucu kiraya verildiği Mahrûse-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan Hasan Bey b. Mehmed nâm bevvâbü’s-sultânî mahfil-i kazâda işbu sâhibü’l-kitâb eş-Şeyh Abdülhâlık b. Ahmed mahzarında ikrâr ve takrîr-i kelâm eyleyip mahrûse-i merkūmede İshakpaşa mahallesinde vâki‘ bir tarafı vâkıfe-i âti’z-zikr vakfı ve bir tarafı Sinan Ağa Vakfı ve bir tarafı Istabl-ı hâssa ve bir tarafı tarîk-i âm ile mahdûd iki fevkānî oda ve bir tahta-pûş ve bir ahır ve bir müşterek su kuyusunu müştemil olup Hürremşâd Hatun Medîne-i Münevvere’ye vakfeylediği menzil hâlâ mahlûl olmağla dellâla verilip Sûk-ı sultânîde nidâ ve mecâlis-i tâlibine kirâren arz ve müzâyede olundukda iki bin akçe icâre-i mu‘accele ve ayda yetmiş beş akçe icâre-i müeccele ile mezkûr eş-Şeyh Abdülhâlık üzerinde karâr edip ziyâde ile tâlib-i âhar zuhûr etmemeğin menzil-i mezbûru târîh-i kitâbdan tevliyet-i mahkiyyem hasebiyle vech-i meşrûh üzere mezkûr eş-Şeyh Abdülhâlık’a îcâr edip ol dahi kabûl ve istîcâr eyledikden sonra zikr olunan iki bin akçe ücret-i mu‘acceleyi yedinden vakf için ahz u kabz ettim ve kendi mâlıyla ihdâs eylediği binâ vakfın olup harc u sarf olunan akçesi icâre-i mu‘accelesine mahsûb ve munzam olmak üzere binâ ve meremmâtına izin verdim dedikde ba‘de’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fî-evâsıtı evveli’r-rebî‘ayn li-sene selâse ve ışrîn ve elf. Şühûdü’l-hâl: eş-Şeyh Mehmed Efendi b. Ahmed, Mehmed Efendi b. ( ) el-imâm, el-Hâc Mehmed et-tabbâh, Hüseyin Bey b. Pervâne, Mehmed Beşe er-râcil, Hasan b. Pervâne, eş-Şeyh Afif el- el-medenî, Ali Çelebi b. Halil ve gayruhüm mine’l-hâzırîn.