Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 175 Hüküm no: 111 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Ağa b. Ali’nin evine kızı Sakine’nin haksız yere el koyduğu Mahrûse-i İstanbul’da Muhtesib İskender mahallesinde bundan akdem vefât eden merhûm Ahmed Ağa b. Ali’nin zevcesi Kamer bt. Ahmed nâm hatun müteveffâ-yı mezbûrun sulbiye kızı olup hakk-ı meşrûtu olmak zum‘uyla menzil-i âti’l-beyânın muhavvata-i hâriciyyesinde beş bâb fevkānî oda ve bir ahıra vâzı‘ü’l-yed olduğu nehc-i şer‘î üzere sâbit olan Sâkine nâm hatunu meclis-i şer‘-i şerîfe ihzâr ve mahzarında takrîr-i da‘vâ eyleyip zevcim müteveffâ-yı merkūm hâl-i sıhhatinde mahalle-i mezbûrede vâki‘ bir tarafı Kamer Hatun mülkü ve tarafeyni Nev‘î Efendi ve Cemile Hatun mülkleri ve bir tarafı Ali Efendi mülkü ve bir tarafı tarîk-i âm ile mahdûd dâhiliyye ve hâriciyye muhavvata ve büyût-ı müte‘addideyi müştemil olan menzilini evvelâ nefsine ba‘dehu bana ve benden sonra evlâdına ve evlâd-ı evlâdına ve ba‘de’l-inkırâz Medîne-i Münevvere’ye vakf ve şart etmiş iken mezkûre Sâkine hâlâ hilâf-ı şart-ı vâkıf zikr olunan odalara ve ahıra vaz‘-ı yed etmişdir suâl olunup men‘ olunmasın taleb ederim dedikde gıbbe’s-suâl mezkûre Sâkine cevâbında fi’l-vâki‘ babam müteveffâ-yı mezbûr menzil-i merkūmu vech-i meşrûh üzere evvelâ nefsine ba‘dehû mezkûre Kamer Hatun ile evlâdına vakfetmekle menzil-i mezkûr hakk-ı meşrûtumdur deyu gıbbe’l-istintâk ve’l-inkâr mesfûre Sâkine’den kelâmına mutâbık beyyine taleb olundukda beyyineden aczine i‘tirâf etmeğin müdde‘iyye-i merkūme Kamer Hatun mâdâm ki hayâtda ola menzil-i mezbûra evlâd vaz‘-ı yed etmemek üzere tenbîh olunup mâ-hüve’l-vâkı‘ bi’t-taleb ketb olundu. [38a] Tahrîren fî-evâsıtı evveli’r-rebî‘ayn li-sene selâse ve ışrîn ve elf. Şühûdü’l-hâl: Fahrü’l-akrân Hasan Bey Mütevellî-i evkāf-ı Medîne-i Münevvere, İbrahim Bey b. Mustafa el-bevvâbü’s-sultânî, Mehmed b. Ahmed, Ali b. Sinan ve gayruhüm.