Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 177 Hüküm no: 113 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilarî Mehmed Ağa Vakfı için Çerkeş kasabasında bina yaptıran el-Hac Rıdvan b. İsa’nın her hangi bir suistimali olmadığı Mahmiye-i Kostantıniyye’de Dârüssaâde ağalarından bundan esbak vefât eden merhûm Kilârî Mehmed Ağa Vakfı’na bi’l-fi‘il mütevellî olan fahrü’l-akrân Süleyman Bey b. Abdülmennan nâm cündî mahfil-i kazâda vilâyet-i Anadolu’da vâki‘ kasaba-i Çerkeş sâkinlerinden el-Hâc Rıdvan b. İsa nâm bevvâbü’s-sultânî mahzarında takrîr-i kelâm eyleyip vâkıf-ı müşârun-ileyh hâl-i sıhhatinde mahsûlü Medîne-i Münevvere fukarâsına sarf olunmak için kasaba-i mezbûrede bazı akār binâsına merkūm el-Hâc Rıdvan’ı tarafından emîn ve vekîl ve ba‘de’l-binâ cem‘-i mahsûle câbî nasb edip vakıf nükūdundan yedine üç bin altı yüz kırk dört aded sikke-i hasene teslîm etmişidi el-hâletü hâzihî mezkûr el-Hâc Rıdvan ne mikdâr akār binâ etmişdir ve binâ olundukdan sonra cibâyeti hasebiyle icâresinden ne mikdâr mahsûl kabz etmişdir suâl olunup muhâsebesi görülmek taleb ederim dedikde gıbbe’s-suâl mezkûr el-Hâc Rıdvan hâl minvâl-i meşrûh üzere olduğuna tav‘an mu‘terif oldukdan sonra cevâb verip fi’l-vâki‘ meblağ-ı mezbûru merkūm Mehmed Ağa bana bin beş senesinde teslîm edip üç sene tamâmına varınca meblağ-ı mezbûr ile kasaba-i mezbûrede ebnâ-i sebîl için elli iki ocaklı iki bâb han ve bir mu‘allimhâne ve bir debbâğhâne ve bir mescid-i şerîf ve yüz elli bâb dükkân ve bir ekmeçi fırını ve bir kahvehâne ve bir çifte hamâm ve hanın civârında on iki göz çeşme dahi binâ olunup ve zikr olunan hamâm ve çeşmelere su götürülüp bu cümleye meblağ-ı mezbûr vefâ etmemekle kendi mâlımdan dahi dört yüz yirmi bir bin yüz altmış beş akçe dahi sarf eyleyip bin sekiz senesinde itmâmı müyesser oldukdan sonra bin on dokuz senesine gelince Celâlî müstevlî olmağla akārât-ı mezkûr îcâr ve istîcâr mümkün olmadığından mâ‘adâ zikr olunan dekâkîni Celâlî ihrâk edip hâlâ kırk bâb dükkân tekrâr tecdîd olunup üç seneden beri gallesinden on altı bin akçe hâsıl olmuşdur. Hâlâ re‘âyâ ve berâyâ yerli yerine gelmeğle mahsûl-i vakf günden güne tezâyüd olmakdadır deyu vilâyet kādısından takrîrine muvâfık arz ibrâz eylediğinden gayrı mahall-i mezbûrdan mürûr ve ubûr eden Müslimînden keyfiyet-i hâl tefahhus ve suâl olundukda hâl minvâl-i meşrûh üzere olduğu mukarrer olmağla mâ-vaka‘a kayd şüd. Tahrîren fî-evâili Saferi’l-hayr li-sene selâse ve ışrîn ve elf. Şühûdü’l-hâl: Molla Ebubekir b. Ramazan el-müsta‘id, Mustafa Bey b. ( ) el-bevvâbü’s-sultânî, Ahmed Bey b. Mustafa el-bevvâbü’s-sultânî, Hasan Bey el-bevvâbü’s-sultânî, Abdülkerim Bey b. ( ) el-bevvâbü’s-sultânî, Mehmed Bey el-cündî, Hasan Beşe b. İlyas, Memi b. Abdi, Alişah Efendi el-kādı, el-Hâc Mahmud b. Yusuf, el-Hâc Halil b. el-Hâc Memi, Seyfi b. Mustafa, Muharrirü’l-hurûf Hüseyin b. Mehmed el-müderris ve gayruhüm.