Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 179 Hüküm no: 115 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Münteha Hatun bt. Abdullah’ın vakfiyesi Mâ zübire fîhi mine’l-vakfi ve’t-tesbîl kad sâre lâzımen bi’l-hükmi ve’t-tescîl ve hakemtü bi-sıhhatihî ve lüzûmihî âlimen bi’l-hilâfi beyne’l-eimmeti’l-eşrâf ve’l-eslâf harrerehu’l-fakīr Celal b. Derviş Mehmed el-kassâmü’l-askerî bi-Üsküdar el-mahmiye. Elhamdü li-veliyyihî ve’s-salâtü alâ-nebiyyihî Muhammed ve alâ-âlihi ve sahbihî ecma‘în ve ba‘dehu bu kitâb-ı müstetâbın tahrîrine bâdî sâhibetü’l-hayrât Müntehâ Hatun bt. Abdullah mahrûse-i Üsküdar mahallâtından Gülfem mahallesinde vâki‘ Yeniçeri Mehmed Çelebi b. Ahmed mülkü ile ve tarîk-i âm ile mahdûd mülk menzili hasbeten lillâhi te‘âlâ vakfedip li ecli’t-tescîl mütevellî nasb eylediği Hüseyin Çelebi b. Veliyüddin’ne teslîm eyledi ve şöyle şart eyledi ki mâdâm ki hayâtda ola kendi zevci Oruc Bey sâkin olalar ve kendi dâr-ı bekāya rıhlet ettikden sonra mu‘tekası Emine bt. Abdullah ve Emine-i mezkûrenin zevci Mustafa Çelebi b. el-Hâc Haydar ba‘dehümâ merkūme Emine’nin zevci mezbûr Mustafa Çelebi’den olan evlâdının ahvecine mu‘ayyen ola ve evlâd-ı evlâdına mukarrer ola ve ba‘de’l-inkırâz Medîne-i Münevvere evkāfına mülhak olup sene be-sene Medîne mütevellîsi îcâr edip hâsıl olan galle Medîne-i Münevvere’ye irsâl olunup onda olan fukarâya sarf oluna ve her kim sâkin olursa merhûme Gevherhân Sultân bt. el-merhûm Sultân Selim Hân hazretlerinin rûhlari’çün yevmî üç Fâtiha tilâvet eyleye vâkıfe rûhi’çün üç sûre-i İhlâs tilâvet ede deyu menzil-i mezbûru mütevellî-i mersûma teslîm eyledikden sonra vâkıfe-i mezbûre da‘vâ-yı rücû‘ ve hâkim-i muvakki‘ü’l-kitâba mütevellî-i mersûm ile murâfa‘a olunup hâkim-i muvakkı‘-ı kitâb dahi vâkıf alâ-mevâkıfi’l-hilâf imâm-ı ma‘hûd mezhebi üzere sıhhat-i lüzûmuna hükmedicek mâ-vaka‘a kayd şüd. Hurrire fî-evâsıtı Recebi’l-mürecceb li-sene hamse ve elf. Şühûdü’l-hâl: Mevlânâ Mehmed b. Resul el-imâm bi-câmi‘-i Vâlide Sultân, Mevlânâ Ahmed Efendi b. ( ) el-müezzin, Hürrem Bey b. Abdülkadir, Mevlânâ Mehmed Efendi b. Sinan, Korkud b. Abdullah es-silâhî, Ahmed Bey b. Abdullah es-silâhî, Hasan Halîfe el-imâm bi-Câmi‘-i Gülfem, İbrahim Halîfe b. Veli, İsmail Halîfe el-müezzin veled-i o, Yunus Bey b. Abdullah er-râcil, Mahmud Halîfe el-müezzin bi-Câmi‘-i Mehmed Paşa, Tahir b. el-Hâc Ahmed Bey es-silâhî, İbrahim b. Mehmed er-râcil, Mahmud Halîfe ve gayruhüm.