Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 180 Hüküm no: 116 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Emin Sinan mahallesindeki evin Mehmed Bey b. Ali tarafından kiralandığı Mahmiye-i Kostantıniyye’de Haremeyn-i Muhteremeyn Evkāfı’na bi’l-fi‘il mütevellî olan fahrü’l-akrân Hasan Bey b. Mehmed nâm bevvâbü’s-sultânî mahfil-i kazâda Dergâh-ı âlî -dâme mahfûfen bi’l-me‘âlî- solaklarından işbu sâhibü’l-kitâb Mehmed Bey b. Ali muvâcehesinde ikrâr ve takrîr-i kelâm eyleyip evkāf-ı mezbûreden olup mahmiye-i mahkiyede Kadırga limanı demekle ma‘rûf mevzi‘ kurbünde Emin Sinan mahallesinde vâki‘ tarafeyni vakf-ı mezbûr ve tarafeyni tarîk-i âm ile mahdûd tûlen yirmi zirâ‘ ve arzen on dört zirâ‘ hesâb-ı şatrancî üzere iki yüz seksen zirâ‘ arsa üzerine binâ olunan biri ocaklı ve biri ocaksız fevkānî iki bâb oda ve bir sofa ve altında ahırı ve müşterek kapı üzerinde tûlen sekiz zirâ‘ ve arzen altı zirâ‘ hesâb-ı mezkûr üzere kırk sekiz zirâ‘ fevkānî odayı ve tûlen ve arzen hesâb-ı mezkûre üzere on altı zirâ‘ tahta-pûşu müştemil olan menzil bundan mukaddem yevmî üç buçuk akçe icâre-i müeccele ve icâre-i mu‘accele ile Küçük Ayasofya mahallesinde sâkin fahrü’s-sulehâ Mehmed Dede b. Abdullah nâm kimesnenin tasarrufunda olmağın menzil-i mezbûrun hakk-ı tasarrufunu benim iznim ile mesfûr Mehmed Bey’e tefvîz edip <> mezkûr Mehmed Bey yedinden yirmi bin akçe alıp kabz eylediğimden mâ‘adâ mezkûr Mehmed’in cânib-i vakfa beş yüz akçe daha icâre-i mu‘accele vermeğin <> ben dahi menzil-i mezbûru târîh-i kitâbdan yevmî üç buçuk akçe icâre ile mezbûr Mehmed Bey’e tevliyetim hasebiyle îcâr edip ol dahi vech-i meşrûh üzere istîcâr ve kabûl eyledikden sonra ba‘de’l-yevm menzil-i mezbûrun ta‘mîrine kendi mâlından ne mikdâr akçe harc u sarf ederse icâre-i mu‘accelesine mahsûb olmak üzere ta‘mîr ve meremmâta izin verdim dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Tahrîren fi’l-yevmi’l-aşire min-âhiri’r-rebî‘ayn li-sene selâse ve ışrîn ve elf. Şühûdü’l-hâl: Fahrü’l-cüyûş Ali Çavuş b. Ahmed el-mütevellî alâ-vakfi’l-merhûm Ali Paşa-yı el-atîk, Mevlânâ Mahmud Efendi b. Ramazan el-imâm bi’l-mahalle-i mezbûre, umdetü’l-a‘yân Kurt Ağa b. Abdullah, Hasan Bey b. Abdullah el-bevvâbü’s-sultânî, Receb Bey b. Abdullah el-bevvâbü’s-sultânî, Mehmed Bey b. Ramazan el-cündî, Hasan Beşe b. Abdullah, Mustafa Çelebi b. Hasan el-yesârî, Mustafa b. Mehmed el-müezzin, Üstâd Haydar b. Abdullah, Receb b. Abdullah ve gayruhüm.