Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 181 Hüküm no: 117 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Emin Sinan mahallesindeki evin Mehmed Bey b. Ali tarafından kiralandığı Mahrûse-i İstanbul’da Küçük Ayasofya mahallesinde sâkin fahrü’s-sâlikîn Mehmed Dede b. Abdullah nâm kimesne mahfil-i kazâda Dergâh-ı âlî -dâme mahfûfen bi’l-me‘âlî- solaklarından işbu sâhibü’l-kitâb Mehmed Bey b. Ali mahzarında ikrâr ve takrîr-i kelâm eyleyip Medîne-i Münevvere -sallallâhu te‘âlâ alâ-münevvirihâ- Evkāfı’ndan olup mahrûse-i mezbûrede Kadırga limanı demekle ma‘rûf mevzi‘ kurbünde Emin Sinan mahallesinde vâki‘ tarafeyni vakf-ı mezbûr ve tarafeyni tarîk-i âm ile mahdûd tûlen yirmi zirâ‘ ve arzen on dört zirâ‘ hesâb-ı şatrancî iki yüz seksen zirâ‘ arsa üzerine binâ olunan bir[i] ocaklı ve biri ocaksız fevkānî iki bâb odayı ve bir sofa ve altında ahırı ve müşterek kapı üzerinde tûlen sekiz zirâ‘ ve arzen altı zirâ‘ hesâb-ı mezkûr üzere kırk sekiz zirâ‘ fevkānî odayı ve tûlen ve arzen hesâb-ı merkūm üzere on altı zirâ‘ tahta-pûşu müştemil olan ayda yüz beş akçe ücret-i müeccele ve mu‘accele ile taht-ı tasarrufumda olmağın hâlâ menzil-i mezbûrun hakk-ı tasarrufun evkāf-ı mezbûreye bi’l-fi‘il mütevellî olan fahrü’l-akrân Hasan Bey b. Mehmed nâm bevvâbü’s-sultânî ma‘rifetiyle mesfûr Mehmed Bey’e tefvîz edip ol dahi tefevvüz eyledikden sonra <>mukābelesinde yirmi bin akçe <> yi mersûm Mehmed Bey yedinden bi’t-tamâm ahz u kabz eyledim menzil-i merkūmda aslâ benim alâkam kalmadı dedikde mukırr-ı mezbûrun ikrâr-ı meşrûhunu mezkûr Mehmed Bey vicâhen tasdîk etmeğin mâ-hüve’l-vâkı‘ gıbbe’t-taleb ketb olundu. Tahrîren fî-evâsıtı âhiri’r-rebî‘ayn li-sene selâse ve ışrîn ve elf. Şühûdü’l-hâl: Fahrü’l-cüyûş Ali Çavuş b. Ahmed el-mütevellî-i Ali Paşa, Mevlânâ Mahmud b. Ramazan el-imâm, umdetü’l-a‘yân Kurt Ağa b. Abdülmennan, Hasan Bey b. Abdullah el-bevvâbü’s-sultânî, Receb Bey b. Abdullah Bey [el-bevvâbü’s-]sultânî, Mehmed Bey b. Ramazan el-cündî, Hasan Beşe b. Abdullah, Mustafa Çelebi b. Hasan el-yesârî, Mustafa b. Mehmed el-müezzin, Üstâd Haydar b. Abdullah, Receb b. Abdullah ve gayruhüm.