Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 182 Hüküm no: 118 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Murad’ın oturduğu Yakub Ağa mahallesindeki Haremeyn Vakfı’na ait evde yaptığı tamir ve tadilatın keşfinin yapıldığı Haremeyn-i Muhteremeyn Evkāfı’ndan olup mahrûse-i İstanbul’da Yakubağa mahallesinde vâki‘ bir tarafı Mehmed Bey mülkü ve bir tarafı Mustafa Bey mülkü ve tarafeyni tarîk-i âm ile mahdûd olan menzile altı bin akçe icâre-i mu‘accele ve yevmî üç akçe ücret-i müeccele ile mutasarrıf olan umdetü’l-a‘yân ve’l-emcâd Mehmed Bey b. Murad mahfil-i şer‘-i şâmihü’l-imâd ve râsihü’l-evtâdda takrîr-i kelâm ve ta‘bîr ani’l-merâm eyleyip bundan esbak menzil-i mezbûr harâba müşrif olup tecdîde muhtâc oldukda vakfın müsâ‘adesi olmamağın kendi mâlımdan tecdîd ve imâret edip harc u sarf eylediğim akçe cânib-i vakıfda olan icâre-i mu‘acceleme mahsûb olmak üzere izn-i şer‘î ve ma‘rifet-i mütevellî ile dâhiliyye ve hâriciyyesinde müceddeden iki bâb fevkānî oda ve iki sofa ve bir tahta-pûş ihdâs ve lâzım olan yerlerin ta‘mîr ve taş duvar binâ etmişidim hâlâ kıbel-i şer‘-i şerîfden üzerine varılıp ne mikdâr akçeye tahammülü vardır keşf olunmasın taleb ederim dedikde cânib-i şer‘-i hatîrden Mevlânâ Hüseyin Çelebi b. Mehmed el-müderris ve üstâd Ali b. Halil irsâl olunup zeyl-i kitâbda isimleri tahrîr olunan Müslimîn ile menzil-i mezbûrun üzerine varılıp bi’l-fi‘il evkāf-ı mezbûre mütevellîsi olan fahrü’l-akrân Hasan Bey b. Mehmed nâm bevvâbü’s-sultânî mahzarında keşf olundukda fi’l-vâki‘ vech-i meşrûh üzere iki bâb fevkānî oda ve iki sofa [41a] ve bir tahta-pûş müceddeden binâ ve bazı yerleri ve ahırı ve kilârı ta‘mîr ve termîm ve bir taş duvar ihdâs olunmuş bulunup mesâha olundukda hesâb-ı şatrancî üzere üç [-yüz] kırk zirâ‘ dolma duvarı ve beş yüz zirâ‘ döşeme-i tahta ve tuğlası ve üç yüz on dört zirâ‘ tavanı ve otuz zirâ‘ taş duvarı olup bu cümleye harc olunan taş ve kireç ve kiremid ve tahtanın ve dört oda kapısı ve ceviz ağacından havlu kapısının ve üç ocak ve iki masandıra ve dahlîz direkleri ve trabzanların ve beş aded camın ve ahır ve tahtânî kilâr meremmâtının ve beş aded dolabın ve yüz kırk zirâ‘ kaldırımın üstâdiyye ve hammâliyye ve neccâriyye ve ırgadiyyesiyle seksen yedi bin yüz kırk akçeye ve menzil-i mezbûre muttasıl olan üç bâb dükkânın üstünde üç bâb oda tavanı ve kepenkleri ve döşemeleri ve dolma duvarları ve camları ve pencerelerinin ve kapılarının üstâdiyye ve neccâriyye ve ırgadiyye ve hammâliyyesiyle dokuz bin beş yüz akçeye cem‘an zikr olunan ebniyenin doksan altı bin yüz kırk akçeye tahammülü vardır deyu mi‘mâr-ı merkūm ve sâir ehl-i vukūf Müslimânlar ittifâk ettiklerinde mütevellî-i müşârun-ileyh meblağ-ı mezbûru mesfûr Mehmed Bey’in cânib-i vakıfda mukaddemâ olan altı bin akçe icâre-i mu‘accelesine mahsûb ve munzam edip ba‘de’l-yevm dahi vech-i meşrûh üzere menzil-i mezbûrun ta‘mîr ve meremmâtını mâlından edip yine icâre-i mu‘accelesine mahsûb olmak üzere mûmâ-ileyh Mehmed Bey’e izin vermeğin mâ-vaka‘a bi’t-taleb ketb olundu. Tahrîren fî-evâili Cemâziyelûlâ li-sene selâse ve ışrîn ve elf. Şühûdü’l-hâl: Umdetü’l-kirâmi’l-müderrisîn Hacı Efendi b. ( ), kıdvetü’l-müderrisîni’l-kirâm Abdünnebî Efendi b. ( ), fahrü’l-akrân Mehmed Subaşı b. Abdülmennan, Mevlânâ Abdülgani Çelebi el-müsta‘id, fahrü’l-cüyûş Davud Çavuş b. Abdullah, Osman b. Abdullah er-râcil, İbrahim Bey b. Süleyman bölük çavuşu, Ali b. Ömer er-râcil, Rıdvan b. Abdullah er-râcil ve gayruhüm.