Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 183 Hüküm no: 119 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Vakfı’na ait Bostancıbaşı mahallesindeki evin tasarrufu için Fatma bt. Nasuh Bey’in vasisi Mahmud Bey b. Abdülmennan’a hüccet verildiği Havâss-ı Kostantıniyye kazâsına tâbi‘ kasaba-i Silivri kurbünde vâki‘ hadîka-i hâssa üstâdı iken vefât eden merhûm Nasuh Bey b. Abdülmennan’ın sagīre kızı Fâtıma’nın kıbel-i şer‘-i mutahhardan mansûb vasiyy-i şer‘îsi olan fahrü’l-akrân Mahmud Bey b. Abdülmennan meclis-i şer‘-i şerîf-i envere gelip takrîr-i kelâm edip Medîne-i Münevvere -sallallâhu alâ-münevvirihâ mükerrere- Evkāfı’ndan icâre-i mu‘accele ve beher mâh beşer akçe icâre-i müeccele ile sagīre-i mezbûrenin babası merkūm üstâd Nasuh tasarrufunda olup mahmiye-i Kostantıniyye mahallâtından Bostancıbaşı mahallesinde vâki‘ iki tarafı yine vakf-ı mezbûrdan Behram b. Abdullah ve Saliha bt. Abdullah icâresinde olan menzil bir tarafı tarîk-i hâs ve bir cânibi tarîk-i âm ile mahdûd selâmlık ta‘bîr olunan vakıf menzilin hâlâ hakk-ı tasarrufu bi-hasebi’l-kanun sagīre-i merkūmeye intikāl etmeğin vakf-ı mezbûr mütevellîsi olan fahrü’l-emâsil ve’l-akrân Ömer Ağa b. ( ) târîh-i kitâb şehri gurresi târîhiyle müverrah hatm ve imzâsı müştemil menzil-i mezkûrun tasarrufi’çün yedime tezkire verilmişdir nazar olunup mûcebince savb-ı şer‘-i mutahhardan dahi hüccet-i şer‘iyye verilmek matlûbumdur dedikde vasiyy-i mersûm Mahmud Bey yedinde olan tezkireye nazar olunup takrîrine muvâfık bulunmağın işbu hurûf ketb ve imlâ olunup yedine def‘ olundu. Hurrire fi’l-yevmi’s-sâdis mine’l-Muharremi’l-harâm li-sene sitte ve selâsîn ve elf. Şühûdü’l-hâl: Ali Bey b. Abdullah el-yesârî, Oruc Bey b. Abdullah Üstâd-ı hadîka-i hâssa, Yusuf Beşe b. Abdullah el-bostânî, Hasan Çelebi b. Hüseyin, Mustafa Çelebi b. Mehmed, Osman Beşe b. Abdullah Gulâm-ı acemi ve gayruhüm mine’l-hâzırîn.