Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 186 Hüküm no: 122 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Cem Sultan Vakfı mütevellisi Yahya Bey b. Turhan’ın üzerinde vakfın herhangi bir alacağı kalmadığı Mahrûse-i İstanbul’da vâki‘ merhûm Cem Sultân -tâbe serâhû- Evkāfı’na bi’l-fi‘il mütevellî olan fahrü’l-ekârim Ahmed Bey b. Abdülmennan nâm bevvâbü’s-sultânî meclis-i şer‘-i şerîf-i lâzımü’t-tevkīrde vakf-ı mersûm nâzırı olan umdetü’l-havâs ve’l-mukarrebîn mu‘temedü’l-mülûk ve’s-selâtîn sâhib-i ulüvvü’l-kadr ve’l-iclâl sâhibü’l-izbâli’l-mecd ve’l-ikbâl kā‘id-i mekā‘idü’d-devleti’r-râsihatü âkid-i me‘âkidi’l-izzeti’ş-şâmihâ bi’l-fi‘il Dârüssaâdeti’s-seniyye ağası el-Hâc Mustafa Ağa hazretleri huzûr-ı âlîlerinde vakf-ı mezbûra bundan akdem mütevellî olup vefât eden Yahya Bey b. Turhan nâm müteveffânın sulbî oğlu ve vârisi olan hâfız-ı hâze’l-kitâb Hasan Çelebi tarafından ikrâr-ı âti’l-beyânı tasdîka vekîl olup bimâ-hüve nehci’s-sübût şer‘an vekâleti sâbite olan Ahmed Efendi b. Abdülmennan muvâcehesinde ikrâr-ı tâm ve takrîr-i kelâm edip müvekkil-i mezbûr Hasan Çelebi’nin babası müteveffâ-yı mezbûr Yahya Bey’in asl-ı vakf-ı merkūm mâlından makbûz ve zabtı olan üç kerre yüz bin akçenin muhâsebesi görüldükde asl olan meblağ-ı merkūm üç yük akçeden fazla mu‘ameleden üç yük ve seksen yedi bin sekiz yüz akçe dahi hâsıl olup asl ile fer‘ cem‘an altı yüz seksen yedi bin sekiz yüz akçe oldukdan sonra asl olan meblağ-ı merkūmdan yüz doksan iki bin akçesi nakd der-kise bulunup mezbûr Hasan Çelebi yedinden ahz u kabz ettim ve rehin makbûzu ile yüz on beş bin akçesi Salamon nâm Yahudi zimmetinde olduğuna i‘tirâf etmekle kabûl ve kabz eyledim ve fer‘ olan meblağ-ı mezbûrdan üç yüz yirmi bin akçesi Sarây-ı atîk-i sultânî kasablarından Kara Todori ve Yanaki nâm zimmîler zimmetlerinde ve hâne rehni ile elli sekiz bin akçe Zeyrek mahallesinde sâkin Mehmed Çelebi nâm cündî zimmetinde olduğuna i‘tirâf ve kabûl-i rehn ettim ve bi’l-cümle mâl-ı vakf-ı merkūm altı yüz seksen yedi bin ve sekiz yüz akçeden müteveffâ-yı mezbûr Yahya Bey zimmetinde ve oğlu mezbûr Hasan Çelebi zimmetlerinde bir akçe ve bir habbe kalmamışdır dedikde mukırr-ı mezbûr Ahmed Bey’in vech-i merkūm üzere cârî olan ikrârını el-mukarrun-lehü’l-mezbûr Ahmed Efendi vekâleten bi’l-müvâcehe tasdîk ve bi’l-müşâfehe tahkīk edip mâ-hüve’l-vâkı‘ bi’t-taleb ketb olundu. Tahrîren fî-evâhiri’r-rebî‘ayn li-sene selâse ve ışrîn ve elf. Şühûdü’l-hâl: Umdetü’l-erbâbi’l-izzi ve’l-ikbâl Hüseyin Efendi Kâtib, fahrü’l-ecles? Ahmed Efendi Muhâsebe, Mehmed Ağa b. Abdülmennan reisü’n-neccârîn, fahrü’l-akrân Ca‘fer Bey b. Abdülmennan bevvâbü’s-sultânî, fahrü’l-akrân Mustafa Bey Kethüdâ-i bevvâbân, Mustafa Efendi b. ( ) el-imâm be-mahalle-i Balabanağa, Burnad/Burnaz? Mehmed Bey b. ( ) bevvâbü’s-sultânî, Sefer Bey b. Abdülmennan, el-Hâc Mehmed Halîfe b. ( ) el-bevvâbü’s-sultânî, Yusuf Bey b. Veli el-bevvâbü’s-sultânî, Hüseyin Bey b. Berber el-bevvâbü’s-sultânî, Mehmed Bey b. Abdülmennan el-bevvâbü’s-sultânî, Ali Bey b. Abdülmennan el-bevvâbü’s-sultânî, Kuloğlu Mehmed Bey b. Abdullah el-bevvâbü’s-sultânî, Mustafa Efendi el-müderris, İsmail Bey b. ( ) el-bevvâbü’s-sultânî, Himmet b. Halil el-müezzin, Ali Bey b. Abdülmennan el-bevvâb ve gayruhüm mine’l-hâzırîn.