Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 194 Hüküm no: 125 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Osman’nın Kudüs surresinden alacağını surre emini Mehmed Çavuş’tan tahsil ettiği Mahrûse-i Kuds-i şerîf sükkânından fahrü’s-sulehâ eş-Şeyh Osman b. Mahmud meclis-i şer‘-i şerîfde bin yirmi üç senesinde Kuds-i şerîf fukarâsına irsâl olunan surrenin emîni olan müftehârü’l-a‘yân Mehmed Çavuş b. Abdülmennan mahzarında ikrâr ve takrîr-i kelâm edip zikr olunan surreden yedimde olan berât-ı sultânî ve defter-i hâkānî mûcebince yılda otuz altı buçuk altına mutasarrıf olup merhûm Sultân Süleyman Hân aleyhi’r-rahme ve’l-gufrân hazretlerinin rûhi’çün yevmî dört akçe vazîfe ile cüz’-i şerîf tilâvet edip yılda on iki altına mutasarrıf olmağın hâlâ emîn-i müşârun-ileyh Mehmed Çavuş zikr olunan surreden ta‘yîn olunan otuz altı buçuk altını <> ve eczâ’-i şerîf vazîfesinden bir yılda müctemi‘ olan on iki altını cem‘an kırk sekiz buçuk altını bana def‘ ve teslîm eyledi ben dahi yedinden kabz ve tesellüm eyledim. Emîn-i müşârun-ileyhin yedinde sene-i mezbûreden bir habbe hakkım bâkī kalmadı dedikde mukırr-ı mezbûrun vech-i meşrûh üzere cârî olan ikrârın emîn-i müşârun-ileyh dahi vicâhen ve şifâhen tasdîk eyledikde mâ-hüve’l-vâkı‘ gıbbe’t-taleb ketb olundu. Tahrîren fî-evâhiri Cemâziyelâhire li-sene selâse ve ışrîn ve elf. Şühûdü’l-hâl: Fahrü’l-akrân Siyavuş Ağa b. Abdülmennan, Ebubekir b. Ahmed, Teberdâr Ahmed Bey, Mehmed Bey b. Ebubekir el-Kürdî ve gayruhüm.