Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 200 Hüküm no: 132 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Frenk Mehmed Ağa’nın vakfettiği evin hakk-ı süknasının Mehmed Ahras b. Nasuh’a ait olduğu Hüve’l-hak Mâ-hüve’l-mastûr fî hâze’l-varak sâbitün indî alâ-hâze’n-nesak ibn-i Saadeddin Es‘ad kâlehû es‘aden bi’l-fazlı min rabbi’l-felak kādiyen bi’l-askeri’l-mansûr fî Rumeli lâ-zâle yecri fihî hakkun Yu‘melü bimâ-fih inde subûtihî ve ademi menâfîhi şer‘an ketebehu Mehmed b. Sadeddin el-fakīr -ufiye anhümâ- Ta‘allaka ilmî bi-mâ yahtevîhî ketebehü’l-fakīr Abdülaziz b. el-merhûm Saaddeddin el-Kādî bi-asâkiri Anadolu el-ma‘mûre -ufiye anhümâ- Dîvân-ı Hümâyûn’da vezîr-i mükerrem müşîr-i müfahham müdebbir-i umûr-ı cumhûrü’l-ümem el-muhtassu bi-mezîdi inâyeti’l-meliki’l-ehad Ahmed Paşa b. Mehmed ed-Defterî tarafından husûs-ı âti’l-beyâna vekîl-i sâbitü’l-vekâle olan fahrü’l-akrân Hüseyin Çavuş b. Sefer mahfil-i şer‘de ve menzil-i âti’l-beyâna ber-vech-i meşrûtiyyet da‘vâ-yı vakfiyet etmekle vaz‘-ı yed ettiği nehc-i mu‘teber üzere sâbit olan Mehmed Ahras b. Nasuh tarafından husûs-ı âti’l-beyâna vekîl-i sâbitü’l-vekâle olup ve kıbel-i şer‘den vakf-ı âti’z-zikre mütevellî nasb olunan fahrü’l-akrân Hüseyin Çavuş b. Haydar mahzarında takrîr-i da‘vâ edip bundan akdem mahmiye-i Kostantıniyye’de Sarây-ı cedîd-i sultânî’de saray ağası iken vefât eden merhûm Frenk Mehmed Ağa’nın mahrûse-i mezbûrede İshakpaşa mahallesinde vâki‘ ulvî ve süflî on bâb evi ve matbahı ve mahzeni ve ıstablı ve bi’r-i mâyı ve cüneyneyi ve sâhayı hâvî olup bir cânibi sâbıkā İbrahim Bey b. Abdürrahim mülkü ve hâlâ Ahmed b. Abdullah el-cündî mülkü ve bir cânibi tarîk-i âm ve bir cânibi tarîk-i hâs ve bir cânibi serrâc-ı hâs kâtibi Sinan b. Abdullah Vakfı ile mahdûd olan menzil müteveffâ-yı mezbûrun vâris-i ma‘rûfu olmamağın mîrîye âid olmağla mîrî için kabz olunmasın taleb ederim dedikde gıbbe’s-suâl vâzı‘ü’l-yed olan ahras-ı mezbûr tarafından vekâleten ve vakf-ı mezbûra mütevellî olduğu cihetle mezbûr Hüseyin Çavuş cevâb verip merhûm-ı mezbûr Frenk Mehmed Ağa maraz-ı mevtinde âkil iken menzil-i mezbûru atîkası olan Meryem Hatun bt. Abdullah’a ba‘dehâ mezbûre Meryem’in evlâdına ve evlâd-ı evlâdına ve evlâd-ı evlâd-ı evlâd-ı evlâdına ba‘de’l-inkırâzi’l-evlâd Medîne-i Münevvere -şerrefehâ rüteben ve sallâ alâ-münevvirihâ- fukarâsına vakfedip musırran vefât edip sülüs mâlı müsâ‘id olmağla menzil-i mezbûrun cümlesi vakfolup atîka-i mezbûre d[ahi] fevt olmağla hâlâ nevbet mezbûre Meryem’in sadrî oğlu olan mezbûr Mehmed Ahras’ındır deyu vekîl-i mezbûr Hüseyin Çavuş b. Sefer menzil-i mezbûrun ber-vech-i meşrûh vakfolmasını ve ahras-ı mezbûr atîka-i mezbûre Meryem’in oğlu olduğu ve sülüs mâlı müsâ‘id idiği inkâr edicek ba‘de talebi’l-beyyine udûl-i Müslimîn ve ahrâr-ı muvahhidînden mahmiye-i İstanbul’da Atmeydanı nâm mevzi‘ kurbünde sâkin olan Mehmed Bey b. Abdullah ve Vezîr Ahmed Paşa’nın karındaşı olup Dergâh-ı âlî müteferrikalarından Mehmed Ağa b. Abdullah nâm kimesneler gıbbe’l-istişhâdi’ş-şer‘î edâ-i şehâdet-i şer‘iyye edip fi’l-hakīka mersûm-ı mezbûr Frenk Mehmed Ağa maraz-ı fevtinde âkil iken menzil-i mezbûru mülkü iken atîkası mezbûre Meryem Hatun’a ba‘dehâ mezbûre Meryem’in evlâdına evlâd-ı evlâdına ve evlâd-ı evlâd-ı evlâdına ba‘de’l-inkırâzi’l-evlâd fukarâ-i Medîne-i Münevvere -sallallâhu te‘âlâ alâ-münevvirihâya- vakfedip vakf-ı mezbûr üzere musırran fevt oldu ve mezbûr Mehmed Ahras mezbûre Meryem Hatun’un oğludur hâlâ hakk-ı süknâ mezbûr Mehmed Ahras’ındır ve merhûm-ı mezbûrun sülüs mâlı menzil-i mezbûrun cümlesinin vakfiyetine müsâ‘iddir bu husûsa şâhidleriz şehâdet dahi ederiz deyu şehâdet ettiklerinde ba‘de ri‘âyetihî şerâiti’l-kabûl mûcebi ile hükmolunup bu vesîka alâ-mâ-hüve’l-hakīka gıbbe’t-taleb tahrîr olunup yed-i tâlibe def‘ olundu. Tahrîren fî-evâsıtı Şevvâli’l-mükerrem min-şühûri sene hamse aşere ve elf. Şühûdü’l-hâl: Fahrü’l-akrân Hüseyin Bey b. Abdülmennan, fahrü’l-cüyûş Mustafa Çavuş b. ( ), Osman Bey b. Mustafa Çavuş, Mehmed b. el-Hâc Ahmed ve gayruhüm mine’l-hâzırîn.